સુરતમાં વોર્ડના પ્રશ્નોના નિરાકરણ માટે હવે વન ડે, વન વોર્ડ અભિયાન

સુરત: મહાનગર પાલિકામાં વોર્ડના પ્રશ્નોના નિરાકરણ માટે હવે વન ડે, વન વોર્ડ અભિયાન શરૂ કરવાનું પાલિકા કમિશનરે આયોજન કર્યું છે. આવતા અઠવાડિયાથી આ અભિયાન શરૂ કરવામાં આવશે. જેમાં વોર્ડના પ્રશ્નોને વાચા આપવામાં આવશે. આ અભિયાનમાં ખુદ પાલિકા કમિશ્નર બંછાનિધી પાની લોકોના પ્રશ્નને સાંભળશે અને નિરાકરણ લાવવામાં આવશે.

સુરત મહાનગર પાલિકા દ્વારા વન ડે વન વોર્ડ અભિયાન વિશે વાત કરતા મ્યુનિસિપલ કમિશનર બંછાનિધી પાનીએ જણાવ્યું કે, આ અભિયાન હેઠળ મુખ્યત્વે વોર્ડના સ્વચ્છતા, લારી ગલ્લા સહિતના દબાણ, ટ્રાફિક, ઢોરડબ્બા, પ્રાથમિક સુવિદ્યાના પ્રશ્નના નિરાકારણ અંગે પ્રયાસ કરવામાં આવશે. વોર્ડ નં 1 થી આવતા અઠવાડિયાથી અભિયાન શરૂ કરવામાં આવશે. ત્યાર બાદ તબક્કાવાર શહેરના તમામ 29 વોર્ડમાં આ પ્રકારે વન ડે વન વોર્ડ કેમ્પઇન હાથ ધરવામાં આવશે.

ઉલ્લેખનીય છે કે, સુરત મહાનગર પાલિકા દ્વારા સૌ પ્રથમ વખત વોર્ડના પ્રશ્નના નિરાકરણ માટે આ પ્રકારનું આયોજન કર્યું છે. તાજેતરમાં પાલિકાની સામાન્ય સભામાં વોર્ડ સમિતિ સાથે વોર્ડના પ્રશ્નનું સમય મર્યાદામાં નિરાકરણ થતું ન હોવાની નગરસેવકોએ પસ્તાળ પાડી હતી. જેને લઇ આ અભિયાન હેઠળ વોર્ડના પ્રશ્નોને આવરી લેવામાં આવશે. આ સાથે વોર્ડ પ્રમાણે સર્જાઇ રહેલા જમીની પ્રશ્નો જાણીને એનું નિરાકરણ લાવી શકાશે.