મધ્ય અને દક્ષિણ ગુજરાતમાં સવારથી વરસાદ શરૂ, હવામાન વિભાગે કરી 3 દિવસ ભારે વરસાદની આગાહી

ગુજરાતઃ રાજ્યના અમદાવાદ, સુરત અને વડોદરા સહિત અનેક વિસ્તારોમાં વહેલી સવારથી વરસાદ શરૂ થયો છે. અમદાવાદના અનેક વિસ્તારોમાં વરસાદ પડી રહ્યો છે. સરખેજ વિસ્તારમાં જ એક ઇંચ જેટલો વરસાદ વરસી ચુક્યો છે. હવામાન વિભાગે 28 ઓગસ્ટ સુધી રાજ્યમાં ભારે વરસાદની આગાહી કરી છે, જ્યારે ઉત્તર ગુજરાત, દક્ષિણ ગુજરાત અને સૌરાષ્ટ્રમાં ભારેથી અતિભારે વરસાદની આગાહી છે. હવામાન વિભાગની આગાહીને પગલે સુરત શહેરમાં ફરી વરસાદનું આગમન થયું છે. સુરતમાં ઝરમર વરસાદની હેલી જોવા મળી રહી છે, ત્યારે મંગળવારે વહેલીસવારના ચાર વાગ્યા બાદ સુરત શહેરમાં વરસાદે ભારે ધમધમાટી બોલાવી હતી. રાત્રિના 12 વાગ્યાથી સવારના 6 વાગ્યા સુધી સુરત શહેર અને ઓલપાડ તાલુકામાં 1 ઇંચ જેટલો વરસાદ હમણાં સુધી નોંધાઈ ચુક્યો છે. ભારે ધોધમાર વરસાદના પગલે શહેરના નિચાણવાળા વિસ્તારો સહિત ગરનાળા અને અંડરપાસ પ્રભાવિત જોવા મળ્યા છે. ગરનાળામાંથી પસાર થતા વાહનો બંધ પડી જતા વાહન ચાલકોએ પણ રીતસર હાલાકી વેઠવી પડી રહી છે.

સુરત સહિત દક્ષિણ ગુજરાતમાં છેલ્લા બે દિવસથી વરસાદી માહોલ જામ્યો છે. ગતરોજ સુરત શહેરમાં ધીમીધારે વરસાદ નોંધાયો હતો. મંગળવારે વહેલીસવારે ચાર વાગ્યાથી સુરત શહેરમાં મેઘરાજાનું જોર વધુ જોવા મળ્યું હતું. જેના કારણે નીચાણવાળા વિસ્તારો પ્રભાવિત થયા છે. ખાસ કરીને અંડરપાસ અને ગરનાળાઓમા વરસાદી પાણી ફરી વળતા વાહન ચાલકોએ હાલાકી વેઠવી પડી રહી છે..છેલ્લા બે દિવસથી સુરત સહિત દક્ષિણ ગુજરાતમાં મેઘરાજાએ ફરી દેખા દેતા ખેડૂત આલમમાં પણ ખુશ- ખુશાલ થયા છે.

આ સાથે જ ઉકાઇના કેચમેન્ટ એરિયા અને ઉપરવાસમાં પડી રહેલા વરસાદના કારણે ડેમની સપાટીમાં પણ વધારો થયો છે. ત્યારે સુરતના સૂર્યપુત્રી તાપી નદીમાં પણ પાણીનો ધસમસતો પ્રવાહ જોવા મળી રહ્યો છે. સુરત અને ઓલપાડ તાલુકામાં છેલ્લા છ કલાકની અંદર જ એક- એક ઇંચ જેટલો વરસાદ નોંધાઈ ચુક્યો છે.

વડોદરામાં વરસાદ

બીજીતરફ વડોદરા શહેરમાં મેઘરાજાએ પુનઃ પધરામણી કરી છે. વડોદરા શહેર તેમજ જિલ્લામાં ફરી વરસાદી માહોલ જામ્યો છે. વરસાદના પગલે નીચાણવાળા વિસ્તારોમાં પાણી ભરાતા લોકો ફરી મુશ્કેલીમાં મુકાયા છે. નદી કાંઠા વિસ્તારમાં રહેતા લોકોની મુશ્કેલીમાં વધારો જોવા મળી રહ્યો છે. શહેરમાં છેલ્લા દસ દિવસથી વાતાવરણ ખુશનુમા રહ્યુ હતું અને સાથે સાથે ગરમીમાં પણ વધારો થયો હતો. મેઘરાજાના લાંબા વિરામ બાદ ગઇકાલથી ફરી વાતાવરણમાં પલટો આવ્યો હતો અને વાદળો ઘેરાવાનું શરૂ થયું હતું. મંગળવારે સવારથી જ વરસાદ શરૂ થયો હતો. જેના પગલે બે દિવસ બાદ શરૂ થયેલી શાળામાં જતાં વિદ્યાર્થીઓ તેમજ નોકરિયાત વર્ગ પણ વરસાદને પગલે અટવાયા હતા. જો કે, સવારથી વરસી રહેલા વરસાદને પગલે શહેરની એસએસજી હોસ્પિટલ સહિત નીચાણવાળા વિસ્તારમાં પાણી ભરાયા હોવાના અહેવાલ સામે આવ્યા હતા. અહીં લોકોને પારાવાર મુશ્કેલીનો સામનો કરવાનો વખત આવ્યો હતો.