સુરત જિલ્લાના કામરેજ ખાતે આવેલા ખોલવડ ગામમાં ખાડી બ્રિજનું વરસાદી પાણીમાં ધોવાણ થયું છે. તંત્ર દ્વારા કોઈ નક્કર કામગીરી ન કરાતા ગામવાસીઓએ જાતે જે તે સમયે ખાડી બ્રિજ તૈયાર કર્યો હતો. છેલ્લા બે દિવસથી પડી રહેલા ભારે વરસાદના કારણે આ ખાડી બ્રિજનું ધોવાણ થયું હતું. જેના કારણે ગત રોજ અહીંથી પસાર થતો બાઇક સવાર યુવાન પાણીમાં ગરકાવ થઈ ગયો હતો. જ્યાં ફાયર બ્રિગેડ દ્વારા કલાકો સુધી શોધખોળ કરવા છતાં તેની ભાળ મળી ન હતી. ઘટના બાદ લોકોમાં તંત્ર અને સ્થાનિક ધારાસભ્ય પ્રત્યે ઉગ્ર રોષ વ્યાપી ગયો હતો. જ્યાં લોકોનું ટોળું રજૂઆત માટે સરથાણા સ્થિત ધારાસભ્યની ઓફિસે પહોચ્યું હતું અને ઓફિસનો ઘેરાવ કરી ઘટના અંગે વિરોધ કર્યો હતો.
કામરેજમાં ભારે વરસાદના કારણે થયું બ્રિજનું ધોવાણ, બાઇક સવાર પાણીમાં ગરકાવ રજૂઆત માટે પહોંચેલા ટોળામાંથી પાંચ જેટલા સભ્યોએ ધારાસભ્યને મળી આ અંગેની રજૂઆત કરી હતી. ઘટના અંગે ભાજપના ધારાસભ્ય વી ડી. ઝાલા વડીયાએ જણાવ્યું કે, છેલ્લા કેટલાક દિવસોથી એકધારો વરસાદ પડી રહ્યો છે. જેથી વરસાદમાં ખાડી બ્રિજનું કામ પૂર્ણ કરવું શક્ય નથી. જેથી કોન્ટ્રાકટર દ્વારા ખાડી બ્રિજનું કામ હાલ પૂરતું અટકાવી દેવામાં આવ્યું હતું. લોકોને અગવડતા ન પડે તે માટે ડાયવર્ઝનનું બોર્ડ પણ લગાવવામાં આવ્યુ હતું. તેમ છતાં લોકોને અવર-જવર માટે અન્ય રસ્તો દૂર પડતો હોવાથી જીવના જોખમે ખાડી બ્રિજ પરથી પસાર થઈ રહ્યા હતા. જેના કારણે આ ઘટના બની છે. ખાડીના પાણી બે કાંઠે વહી રહ્યા છે. જેના કારણે તણાયેલ યુવાનનો હજી કોઈ પત્તો નથી લાગ્યો. છતા ફાયર વિભાગના જવાનો તેની શોધખોળ ચાલુ રાખી છે. વરસાદ બંધ થતા જ ખાડીના બ્રિજનું બાકી રહેતું કામ તાકીદે પૂર્ણ કરી દેવામાં આવશે.
