રાજકોટ : આજની વાત કરવામાં આવે તો રાજકોટમાં ત્રણ જેટલા કોરોનાના પોઝિટિવ કેસ સામે આવ્યા છે. જેમાં રાજકોટના કોરોના હોટસ્પોટ જંગલેશ્વર વિસ્તારમાં આવેલ અંકુર સોસાયટીના 25 વર્ષના એક પુરુષ દર્દીની સાથે રાજકોટ ગ્રામ્ય વિસ્તારમાં આવેલ આટકોટના એક માતા અને તેના 13 વર્ષના પુત્રનો રિપોર્ટ પોઝિટિવ આવ્યો છે. આ પરિવાર અમદાવાદના નિકોલમાંથી ચાર દિવસ અગાઉ જ આટકોટ ખાતે આવ્યો છે. જેને લઈને રાજકોટ ગ્રામ્યમાં અત્યાર સુધીમાં 14 કોરોનાના પોઝિટિવ કેસ આવ્યા છે. જ્યારે રાજકોટ શહેરમાં 79 કેસ સામે આવ્યા છે.
આ સાથે જ રાજકોટ જિલ્લામાં કુલ કોરોના પોઝિટિવ કેસની સંખ્યા 93એ પહોંચી છે. ઉલ્લેખનીય છે કે, રાજકોટમાં કોરોનાના અત્યાર સુધીમાં બે દર્દીના મોત થયા છે. જેમાં એક રાજકોટ શહેર અને એક રાજકોટ ગ્રામ્યના દર્દીનો સમાવેશ થાય છે.
