પોરબંદરમાં ખેડૂત પુત્રની કમાલ, અનોખા કરતબથી લોકોને કર્યા આશ્ચર્યચકિત

પોરબંદર : સામાન્ય રીતે ખેડૂતોનું જીવન ખેતરમાં જ પસાર થતુ હોય છે અને ખેડૂતો તેના પાક માટે અને ખેતરના કામકાજમાંમાં વ્યસ્ત હોય છે. પરંતુ, પોરબંદર નજીકના એક ખેડૂત પુત્રએ ઇન્ટરનેટના માધ્યમ અને ટીવીના માધ્યમથી જીમનાસ્ટિકના અલગ અલગ કરતબો શીખીને લોકોને આશ્ચર્યમાં મૂક્યા છે. આ ખેડૂત પુત્રના સ્ટંટ જોવા અનેક લોકો મુલાકાતે આવે છે, તો સોશિયલ મીડિયામાં પણ આ યુવાનના અનેક વીડિયો વાયરલ થયા છે.

જિલ્લા નજીકના રતનપુર ગામમાં રહેતા રામ ઓડેદરા જે હાલ બીએસસીમાં અભ્યાસ કરી રહ્યો છે. પરંતુ, પોતાના ખેતરમાં જ તેને જુગાડ કરીને વેસ્ટમાંથી જીમનાસ્ટિકના સાધનો બનાવ્યા અને કસરત કરવાનું શરૂ કર્યું. ધીમે ધીમે પોતાના આત્મવિશ્વાસ વધતો ગયો અને તેના કરતબના વિડીયો આજે સોશિયલ મીડિયામાં વાયરલ થઇ રહ્યા છે. જેને લઇને લોકોનું પણ કહેવું છે કે આ યુવાનને જો યોગ્ય માર્ગદર્શન અને સફળતા માટેનો યોગ્ય રસ્તો મળે તો દેશ જ નહીં પણ દુનિયાનું નામ રોશન કરી શકે તેમ છે.

કહેવાય છે ને મોરના ઈંડા ચીતરવા ન પડે રામ ઓડેદરાના દાદા ખીમાભાઈ પણ રાજાશાહી વખતમાં દોડની સ્પર્ધામાં ભાગ લેતા અને તેમાં પણ તે ફર્સ્ટ આવ્યા હતા. આ ઉપરાંત તેઓ મહેર સમાજમાંથી આવતા હોવાથી મહેર સમાજના પ્રખ્યાત મણીયારા રાસમાં પણ તેઓ 12 કલાક સુધી મણિયારો રાસ રમવાની સ્ટેમિના ધરાવતા હતા. આજે પણ ખીમાભાઈ તંદુરસ્ત છે અને તેના પૌત્ર સાથે પણ રનીંગ કરી શકે છે. જે દ્રશ્યો જ બતાવી રહ્યાં છે.