પાટણ:બંધ પડેલા પમ્પિંગ સ્ટેશન મામલે ધારાસભ્યએ આપી ભૂખ હડતાલની ચીમકી

પાટણ કોંગ્રેસના ધારાસભ્ય કિરીટભાઈ પટેલે મુખ્ય પ્રધાન વિજય રૂપાણીને પત્ર લખી શહેરના હાંસાપુર વિસ્તારમાં વર્ષોથી બંધ પડેલા પમ્પિંગ સ્ટેશનને શરૂ કરવાની માગણી કરી છે. આ મામલે અનેકવાર રજૂઆતો કરવા છતાં સત્તાધીશોના પેટનું પાણી પણ ન હલતા આખરે ધારાસભ્યએ નવા બનેલા પમ્પિંગ સ્ટેશનને 11 ફેબ્રુઆરી સુધી ચાલુ ન કરવામાં આવે, તો કાર્યાલય ખાતે ભૂખ હડતાલ પર ઉતરવાની ચીમકી ઉચ્ચારી છે.

પાટણ: પાટણના હાંસાપુર વિસ્તારમાં થોડા વર્ષો પહેલા નવા બનેલા પરંતુ બંધ પડેલા પમ્પિંગ સ્ટેશનને કાર્યરત કરાવવા મામલે રાજકારણ ગરમાયું છે. ધારાસભ્ય કિરીટભાઈ પટેલે મીડિયા સાથેની વાતચીતમાં કેબિનેટ પ્રધાન દિલીપભાઈ ઠાકોર અને જિલ્લા ભાજપ પ્રમુખ સામે આક્ષેપ કર્યા હતા અને લોકો તકલીફ ભોગવી રહ્યા અંગે જણાવ્યું હતું.

બંધ પડેલા પમ્પિંગ સ્ટેશન મામલે પાટણ કોંગ્રેસના ધારાસભ્યે ભૂખ હડતાલની આપી ચીમકી

જો કે, પત્ર લખવાની આ ઘટના બાદ માત્ર 24 કલાકમાં જ પાટણ નગરપાલિકા તંત્ર હરકતમાં આવ્યું હતું અને પાટણ નગરપાલિકાના પ્રમુખ, ચીફ ઓફિસર સહિતના સ્ટાફે હાંસાપુર પમ્પિંગ સ્ટેશન ખાતે પહોંચી તેને કાર્યરત કરવાના પ્રયાસો હાથ ધર્યા હતા.

11 ફેબ્રુઆરી સુધી ચાલુ ન કરવામાં આવે તો કાર્યાલય ખાતે ભૂખ હડતાલ પર ઉતરવાની ચીમકી ઉચ્ચારી

પાટણ નગરપાલિકાના પ્રમુખે પમ્પિંગ સ્ટેશન બાબતે ધારાસભ્યના આક્ષેપને ખોટા ગણાવ્યા હતા અને કહ્યું હતું કે, અત્યારસુધી ધારાસભ્ય દ્વારા અનેક મુદ્દે આક્ષેપો કરવામાં આવ્યા છે. જે પૂરવાર થઇ શક્યા નથી. આ વિસ્તારમાં પાઈપો જામ થઇ ગઇ છે માટે તેનુ ચેકીંગ કરવામાં આવે છે. તે કામગીરી પૂર્ણ થશે ત્યારે સ્ટેશન શરૂ થઈ જશે.