મહીસાગરમાં સુજલામ સુફલામ યોજના અંતર્ગત શ્રમિકોને ઘરઆંગણે રોજગારી

મહીસાગર જિલ્લામાં પણ ઊંડાણ અને અંતરિયાળ વિસ્તારમાં આવેલ ગ્રામ્ય વિસ્તારોમાં પણ સુજલામ સુફલામ જળસંચય યોજના થકી મહાત્મા ગાંધી રોજગાર બાંયધરી યોજનાના કામો દ્વારા શ્રમિકોને રોજગારી આપવામાંં આવશે.

લુણાવાડાઃ સરકારે ગ્રામીણ વિસ્તારોમાં વસતા પરિવારો માટે ઘરઆંગણે રોજગારી પૂરી પાડવાનો મક્કમ નિર્ધાર કર્યો છે. જેના થકી સુજલામ સુફલામ જળ સંચય યોજનાના કામોનો પ્રારંભ કરવામાં આવ્યો છે. મહીસાગર જિલ્લામાં પણ ઊંડાણ અને અંતરિયાળ વિસ્તારમાં આવેલ ગ્રામ્ય વિસ્તારોમાં પણ સુજલામ સુફલામ જળસંચય યોજના થકી મહાત્મા ગાંધી રોજગાર બાંયધરી યોજનાના કામો દ્વારા શ્રમિકોને રોજગારી આપવામાંં આવશે.

સુજલામ સુફલામ જળસંચય યોજના અંતર્ગત મનરેગા થકી અંતરિયાળ વિસ્તારમાં કડાણા તાલુકાના ભુલ ગામે આવેલ સિંચાઈ તળાવ અને કોયા તળાવ આમ બંને તળાવો ઉંડા કરવાની કામગીરી હાલમાં કાર્યરત છે. આ બંને તળાવો ઉંડા થતા તેમાંથી 6050 ઘન મીટર માટી કાઢવામાં આવશે. જેનાથી આ તળાવમાં 60.50 લાખ લીટર પાણી સંગ્રહ કરવાની શક્તિમાં વધારો થશે. આ કામગીરીમાં અંદાજીત રૂપિયા 11.72 લાખનો ખર્ચ કરવામાં આવશે.

અત્યાર સુધીમાં 3270 ઘનમીટર માટીનું ખોદાણ કરવામાં આવેલ છે. જેમાં 163 જેટલા શ્રમિકોને 4196 માનવ દિનની રોજગારી પૂરી પાડવામાં આવી છે અને રૂપિયા 6.32 લાખનો ખર્ચ કરી કોરોનાનાં કપરા કાળમાં ઘેર બેઠા રોજગારી પૂરી પાડી રોજનું પેટીયું રળી જીવન ગુજરાન ચલાવતાં શ્રમિક પરિવારો માટે આશીર્વાદ રૂપ પુરવાર થશે.

આ જળસંચયની કામગીરી દરમિયાન કોરોના સંદર્ભે પુરતી તકેદારી રાખવામાં આવે છે. શ્રમિકોને સોશિયલ ડિસ્ટન્સિંગ જાળવી, માસ્ક અને સેનેટાઇઝરનો ઉપયોગ કરી તેમજ અવારનવાર આરોગ્ય વિભાગ દ્વારા શ્રમિકોની આરોગ્ય તપાસ કરવામાં આવે છે. જેથી શ્રમિકોને કોરોના સંક્રમણથી સુરક્ષિત રાખી શકાય સાથે-સાથે કામના સ્થળે શ્રમિકોને ઉનાળાની ગરમીમાં રાહત મળે તે માટે છાંયડો અને પાણી તથા છાસની પણ વ્યવસ્થા કરવામાં આવી છે.

સુજલામ સુફલામ જળસંચય યોજના અંગે પ્રતિભાવ આપતા ભૂલ ગામના સરપંચ પોપટભાઈ નાથાભાઈ ડિંડોર કહે છે કે, અમારા ગામના બંને તળાવો ઊંડા થતાં ગામમાં આવેલા કુવાઓ રીચાર્જ થતાં પાણીના જળસ્તરમાં વધારો થતાં કુવાના જળ સ્તર ઊંચા આવશે. તેમજ આ તળાવમાંથી બારેમાસ પાણી ભરાઈ રહેશે એટલે ખેતીવાડી માટે, પશુઓ માટે તેમજ ઘર વપરાશ માટે પુરતુ પાણી મળી રહેશે.

બારેમાસ પાણી મળતા શિયાળો, ઉનાળો સિઝનમાં ખેતી માટે પાણીની કોઈ મુશ્કેલી નહીં પડે એટલે ખેતી વિકાસ સારો થશે. જેનાથી ગ્રામજનોની આવકમાં સારો એવો વધારો થતાં આર્થિક રીતે કોઈપણ મુશ્કેલી નડશે નહીં. જે લોકડાઉનના કપરા સમયમાં તળાવ ઉંડુ કરવાની કામગીરીમાં જોડાયેલા163 જેટલા શ્રમિકોને રોજગારી મળી રહે છે તે ઘણી જ આશીર્વાદરૂપ સાબિત થશે.