ડાકોરઃ રાજ્ય સરકાર દ્વારા 10 જાન્યુઆરીથી ભિક્ષુકો માટે પરિપત્ર જાહેર કરાયો છે. જોકે, આજે પણ યાત્રાધામ ડાકોરમાં અનેક ભિક્ષુકો મંદિર બહાર ભીખ માંગતા જોવા મળી રહ્યા છે. શક્ય છે કે, રાજ્યમાં અન્ય ધાર્મિક સ્થળોએ પણ આ જ સ્થિતિ જોવા મળતી હોય છે. ડાકોરમાં પૂનમ કે કોઇ મોટો તહેવાર હોય ત્યારે ભિક્ષુકોની લાંબી કતાર જોવા મળતી હોય છે. એક પરિપત્રને કારણે તેની સંખ્યામાં ઘટાડો થયો છે, પરંતુ મંદિર બહાર ભિક્ષુકો જોવા તો મળે જ છે એ સ્વાભાવિક છે. ભિક્ષુકો આવા કોઈ નિર્ણય કે પરિપત્રથી અજાણ હોય તેવું બની શકે.
સરકારના પરિપત્રને લઇ વિવિધ મત પ્રવર્તી રહ્યા છે. આ અંગે ડાકોર મંદિરના મેનેજર સરકારના આ નિર્ણયને વધાવી રહ્યા છે. તેમનું કહેવુ છે કે, ભિક્ષુકો ન બેસે તે નિર્ણય યોગ્ય છે, પરંતુ સરકારે તેમને કોઇ સગવડ આપવી જોઇએ. તેમણે જણાવ્યું કે, વિવિધ સંસ્થાઓ મારફતે સરકારે ભિક્ષુક પોતાનું ગુજરાન ચલાવી શકે તે માટે પગાલ લેવા જોઈએ.
બીજી તરફ ડાકોર મંદિરના સેવકોનું કહેવુ છે કે, ભિક્ષા આપવી એ આપણા સનાતન ધર્મનો એક ભાગ છે, ત્યારે સરકાર આવુ કેવી રીતે કરી શકે. આવા પરિપત્રથી લોકોની ધાર્મિક લાગણી દુભાઈ શકે છે. શ્રધ્ધાળુઓમાં આસ્થા હોય છે કે, દાન કરવાથી તેમને પુણ્ય મળશે. ખાસ કરીને વિશેષ તહેવારોમાં તેનુ મહત્વ વધી જતુ હોય છે.
મહત્વનું છે કે, રાજ્યમાં જાણીતા યાત્રાધામોમાં મોટી સંખ્યામાં અશક્ત, નિરાધાર, બીમાર લોકો ભિક્ષા માંગવાની પ્રવૃત્તિમાં સંકળાયેલા છે, ત્યારે સરકારના પરિપત્રને લઇ જુદા-જુદા મત જોવા મળી રહ્યા છે. હવે યાત્રાધામોમાં પરિપત્રનું કેવી રીતે પાલન થાય છે અને યાત્રાધામોમાં ભિક્ષા માંગવાની પ્રવૃત્તિ અટકે છે કે કેમ તે જોવું રહ્યું.
