ખેડા જીલ્લા ચૂંટણીતંત્ર દ્વારા આગામી લોકસભા ચૂંટણીની તડામાર તૈયારીઓ શરૂ કરવામાં આવી છે. લોકસભા ચૂંટણી અન્વયે મંગળવારે રાજકીય પક્ષોની હાજરીમાં EVMનું રેન્ડમાઇઝેશન કરવામાં આવ્યું હતું.
જીલ્લા ચૂંટણી અધિકારી સુધીર પટેલ, નિવાસી અધિક કલેકટર રમેશ મેરજા, નાયબ જીલ્લા ચૂંટણી અધિકારી વી. એમ. રાજપૂત તેમજ મદદનીશ ચૂંટણી અધિકારીઓની ઉપસ્થિતિમાં નડિયાદથી 1749 જેટલા EVM તેમજ VVPAT જીલ્લાના છ વિધાનસભા મતવિભાગના સ્ટ્રોંગરૂમમાં મોકલવામાં આવ્યા હતા. જેથી ચૂંટણીના દિવસે તેને મતદાન મથકે પહોંચાડવામાં સરળતા રહેશે.
નાયબ જિલ્લા ચૂંટણી અધિકારી વી. એમ. રાજપૂતે જણાવ્યું હતું કે, નડિયાદ ખાતેના વેરહાઉસમાંથી આજે જીલ્લાના છ વિધાનસભા મતવિભાગ માટે EVM-VVPATનું વિતરણ કરવામાં આવ્યું હતું. દરેક વિધાનસભામાં 18 ટકા વધુ EVM-VVPATની ફાળવણી કરવામાં આવી છે. આ EVM જે તે વિધાનસભા મતવિભાગના સ્ટ્રોંગરૂમમાં રાજકીય પક્ષોની હાજરીમાં મુકવામાં આવશે.
ખેડા જીલ્લામાં લોકસભા ચૂંટણીમાં મહત્તમ મતદાન થાય, તે માટે મતદાર જાગૃતિ અભિયાન સાથે મતદારોને સમક્ષ EVM તેમજ VVPATનું નિદર્શન કરવામાં આવ્યું હતું.
