ગાંધીનગરઃ શિક્ષણ પ્રધાન ભુપેન્દ્રસિંહ ચુડાસમાએ જણાવ્યું હતું કે, કોરોના વાઇરસના કારણે આ વખતે વિધાર્થીઓના શૈક્ષણિક સત્રમાં ઘટાડો કરવામાં આવશે. તેથી માધ્યમિક અને ઉચ્ચતર માધ્યમિક શિક્ષણના અભ્યાસક્રમમાં 30 ટકાનો કાપ મુકવામાં આવશે. એટલે કે, ધોરણ - 9થી 12નો અભ્યાસક્રમ 30 ટકા ઘટશે.
આ સાથે ભુપેન્દ્રસિંહ ચુડાસમાએ જણાવ્યું હતું કે, શિક્ષણ જગતના અનુભવી તજજ્ઞો સાથે મળીને આ અંગે નિર્ણય લેવામાં આવ્યો છે કે, ધોરણ 10 અને 12 બોર્ડની પરીક્ષાઓ મે મહિનામાં લેવામાં આવશે. જ્યારે ધોરણ 9 અને 11ની પરીક્ષાઓ જૂન મહિનામાં લેવામાં આવશે. આ સાથે અભ્યાસક્રમમાં 30 ટકા કાપ થતા 70 ટકા અભ્યાસક્રમમાંથી જ પ્રશ્નપત્ર કાઢવામાં આવશે. ધોરણ 10 અને 12માં ઉપયોગી પ્રકરણો 9 અને 11માં ચાલુ રહેશે.
ઉલ્લેખનીય છે કે, જે અભ્યાસક્રમ સ્પર્ધાત્મક પરીક્ષાઓ માટે જરૂરી છે, તેને યથાવત્ રાખવામાં આવ્યો છે. આ નવા અભ્યાસક્રમ અંગેની માહિતી જિલ્લા શિક્ષણ અધિકારીઓને મોકલી દેવામાં આવશે.
