ATM તોડવાનો પ્રયાસ નિષ્ફળ, ઉમરગામ પોલીસે કરી 2ની ધરપકડ

ઉમરગામઃ ઉમરગામ GIDCમાં આવેલા HDFC બેંકના ATMને તોડી પૈસા ચોરી કરવાનો પ્રયત્ન કરનારા બે ચોરને બેંકની સિક્યુરિટી ઑફિસના ઇન્ચાર્જ અને પોલીસની સતર્કતાને કારણે ઝડપી પાડવામાં આવ્યા છે.

આ અંગે મળતી માહિતી મુજબ ઉમરગામ GIDC વિસ્તારમાં આવેલ HDFC બેંકના ATMને ગત રાત્રીના બે ઈસમોએ તોડવાનો પ્રયાસ કર્યો હતો. આ સમગ્ર ઘટના મુંબઈથી મોનીટરીંગ કરતા આરગાજ સિક્યુરિટી એજન્સીના CCTVમાં નજરે આવતા તુરંત જ ATMમાં મુકેલા એલાર્મ બજાવવામાં આવ્યું હતું. જે સાંભળી બંને ચોર નાસી છૂટ્યા હતા. આ અંગે એજન્સીએ તાત્કાલિક ઉમરગામ પોલીસ સ્ટેશનમાં જાણ કરતા ઉમરગામ પોલીસે પેટ્રોલિંગ દરમિયાન બંને ચોર ઇસમને ઝડપી પાડી આગળની કાર્યવાહી હાથ ધરી છે.

આ ઝડપાયેલા બંને ચોરમાં દિલીપ બિહારી યાદવ અને આકાશ રામચંદ્ર શર્મા વધુ પૈસા કમાવાની લાલચમાં આવી HDFC બેંકના ATMને નિશાન બનાવ્યું હતું. પરંતુ, તેમનો આ ચોરીનો પ્રયાસ મુંબઇ બેસીને CCTV નું મોનીટરીંગ કરતી એજન્સીએ નિષ્ફળ બનાવ્યો હતો. આ સમગ્ર મામલે પોલીસમાં જાણ કરતા પોલીસે ગણતરીની કલાકોમાં જ બંન્ને ચોરની ધરપકડ કરી હતી.