ભાવનગર: કવિઓનું સર્જન કરતી દર બુધવારની બુધસભાની એક પણ બેઠક આજદિન સુધી રદ નથી થઈ. ત્યારે લોકડાઉનમાં પણ ચાર બેઠક યોજાઇ ગઈ છે. કવિઓએ સોશિયલ મીડિયાનો દુષ્પ્રચાર કે અફવા માટે નહીં પણ સાહિત્યને બચાવવા અને નવી રચનાઓને અમલમાં લાવવા ઉપયોગ શરૂ કર્યો છે. ભાવનગરમાં ચાર બુધસભા વોટ્સએપમાં યોજાઈ અને લોકડાઉન રહે ત્યાં સુધી બુધસભા ચાલુ રાખી તેને ખંડિત નહીં કરવાનું બીડું પણ સંચાલકોએ ઉપાડ્યું છે.
ભાવનગરમાં બુધસભા 1980થી શહેરની શિશુવિહારમાં ચાલે છે. નવા નવા કવિઓની રચનાઓ અહીંયા બુધ સભામાં મુકવામાં આવે છે. પણ હાલ લોકડાઉનમાં રૂબરૂ કવિઓની મુલાકાત સંભવ નથી ત્યારે બુધસભાની એક પણ બેઠક સંચાલક દ્વારા લોકડાઉન હોવા છતાં પણ આ સભા ખંડિત થઇ નથી.
શિશુવિહારમાં ચાલતી બુધસભામાં દર બુધવારે સાંજે 6.15 થી 7.30 સુધી યોજવામાં આવે છે. નવા કવિઓ અને જૂના કવીઓનું મિલન બુધસભામાં થાય છે. સ્વ તખ્તસિંહજી પરમાર દ્વારા 1980માં શરૂ કરવામાં આવેલી બુધસભાની બેઠકો 2000 ઉપર પહોચી ગઈ છે. એક પણ બુધસભા આજદિન સુધી બંધ રહી નથી એ સૌથી મોટી વાત છે સંચાલકો બદલાતા રહ્યા અને નવા કવિઓ આવતા રહ્યા પણ બુધસભા બંધ રહી નથી.
શહેરના ચોકમાં ઓટલા પરથી શરૂ થયેલી બુધસભાની બેઠકો આજે પણ શરૂ છે. આ બુધસભાના હાલના સંચાલક કૃપાબેન ઓઝાએ બુધસભાને યથાવત રાખી છે. સોશિયલ મીડિયાનો ભરપુર ઉપયોગ આજે આપના સાહિત્યને બચાવવામાં થઈ રહ્યો છે જે સારી નિશાની છે કૃપાબેન લોકડાઉનમાં બુધ સભા વોટસઅપ પર યોજી રહ્યા છે.
બુધવારે 15 એપ્રિલ 2020ની 2067મી બુધસભાની બેઠક વોટ્સએપ પર યોજવામાં આવી હતી. બુધસભાના સાંજના સમયમાં દરેક ઇચ્છુક કવિઓ એકબીજા પાસેથી નંબર મેળવીને બુધસભાના ગ્રુપમાં એડ થાય છે. બુધસભાના દિવસે પોતાની નવી રચેલી કવિતાઓ, દુહા કે શાયરી કે પછી મુશાયરા મૂકે છે. કૃપાબેન દરેક કવિએ મુકેલી નવી રચનો એક નોટબુકમાં લખે છે અને આમ બુધસભાની પ્રણાલીને લોકડાઉનમાં પણ યથાવત રાખી રહ્યા છે. કૃપાબેન ત્રણ બુધસભા વોટ્સએપમાં કરી ચુક્યા છે. બુધસભામાં આશરે 40 જેટલા કવિઓ જોડાયેલા છે અને નવા આવતા કવિઓને પણ સ્થાન આપવામાં આવે છે
