બનાસકાંઠા જિલ્લામાં છેલ્લા 1 મહિનાથી ગુનાહિત પ્રવૃતિઓમાં ચિંતાજનક વધારો થઈ રહ્યો છે. લૂંટારૂઓને જાણે પોલીસનો ડર જ ના હોય તેમ એક પછી એક ગુનાહિત પ્રવૃત્તિઓને અંજામ આપી રહ્યા છે. જિલ્લાના અનેક તાલુકાઓમાં ચેનસ્નેચિંગના બનાવો બહાર આવ્યા છે. બાઇક પર સવાર થઇ અત્યાર સુધી અનેક લોકોને ટાર્ગેટ બનાવી તેમના ગળામાંથી ચેન તોડી આરોપીઓ ફરાર થઈ રહ્યા છે.
ડીસાના વી.એન પાર્કમાં રહેતા જ્યાંબેન ઠક્કર રાબેતા મુજબ પોતાના ઘરેથી સોસાયટીની બહાર જઈ રહ્યા હતા, ત્યારે બાઈખ પર સવાર 2 અજાણ્યા શખ્સો તેમની નજીક આવ્યા અને ગળામાં પહેરેલી અઢી તોલાની સોનાની ચેન તોડી નાસી ગયા હતા. આ વૃદ્ધ મહિલાએ બૂમાબૂમ કરતા આજુબાજુના લોકો પણ દોડી આવ્યા હતા, પરંતુ ત્યાં સુધી અજાણ્યા શખ્સો સોનાનો દોરો તોડી ફરાર થઈ ગયા હતા. ત્યારબાદ મહિલાના પરિવારજનો આવતા તાત્કાલિક ધોરણે પોલીસને જાણ કરવામાં આવી હતી.
આ મામલે પોલીસે ઘટનાસ્થળે આવી CCTV ફુટેજમાં દેખાતા બે અજાણ્યા શખ્સો વિરુદ્ધ ગુનો નોંધી કાયદેસરની કાર્યવાહી હાથ ધરી છે. અત્રે ઉલ્લેખનીય છે કે, ઉપરા ઉપરી બની રહેલ ચિલ ઝડપની ઘટનાઓથી ડીસાવાસીઓમાં ભયનો માહોલ છવાયો છે.
