ચેન્નાઈ : વર્લ્ડ કપ 2023 માં ભારત અને ઓસ્ટ્રેલિયા સામેની બે હાર બાદ જીતના લક્ષ્ય સાથે પાકિસ્તાન ટીમ મેદાનમાં ઉતરશે. આજે ચેન્નાઈના MA ચિદમ્બરમ ક્રિકેટ સ્ટેડિયમ ICC ક્રિકેટ વર્લ્ડ કપ 2023 ની 22 મી મેચ રમાશે, જેમાં બાબર આઝમની આગેવાનીમાં પાકિસ્તાન ટીમ અફઘાનિસ્તાન સામે ટકરાશે. ઉલ્લેખનિય છે કે, પાકિસ્તાન ક્રિકેટ ટીમને વર્લ્ડ કપની દાવેદાર ટીમ માનવામાં આવે છે. જોકે ઘણી અપેક્ષાઓ સાથે આવેલી પાક. ટીમ હજુ સુધી સારું પ્રદર્શન કરવામાં નિષ્ફળ રહી છે.
પાકિસ્તાનના સુકાની અને સ્ટાર બેટ્સમેન બાબર આઝમે અત્યાર સુધી ટુર્નામેન્ટમાં ભારત સામેની અડધી સદી સિવાય પોતાની બેટિંગનો કોઈ ખાસ જાદુ બતાવી શક્યા નથી. જોકે મોહમ્મદ રિઝવાને ટૂર્નામેન્ટના 294 રન સાથે ટોચના રન-સ્કોરર તરીકે પાકિસ્તાની બેટિંગ યુનિટ માટે મોટા ભાગનું કામ કર્યું છે. પરંતુ તેને સામા છેડેથી સપોર્ટનો અભાવ રહ્યો છે. સઈદ શકીલ અને ઈફ્તિહાર અહેમદે મિડલ ઓર્ડરમાં પોતાની ભૂમિકા ભજવી શક્યા નથી.
ફાસ્ટ બોલર શાહીન આફ્રિદીએ છેલ્લી રમતમાં પાંચ વિકેટ ઝડપી હતી, પરંતુ ઝડપી બોલર હરિસ રઉફ અને હસન અલી વિપક્ષી બેટ્સમેન માટે મુશ્કેલી ઊભી કરી શક્યા નથી. વધુમાં સ્પિનરો વિકેટ લેવામાં અથવા ટીમ માટે સ્કોરને મર્યાદિત કરવામાં નિષ્ફળ રહ્યા છે. પાકિસ્તાની ટીમને આગામી મેચમાં વિજય નોંધાવવો પડશે, નહિતર એક પરાજય પણ સેમિફાઈનલમાં પ્રવેશવાની તકને અવરોધી શકે છે.
સામેની તરફ અફઘાનિસ્તાનની ટીમ માટે સ્પિન યુનિટ મોટી તાકાત હશે, જેમાં રાશિદ ખાન, મોહમ્મદ નબી અને મુજીબ ઉર રહેમાનનો સમાવેશ થાય છે. ભારતીય પીચની મદદ સાથે ત્રણેય સ્પિનરોનું પ્રદર્શન મેચમાં અફઘાનિસ્તાનની સફળતા નક્કી કરે તેવી શક્યતા છે. જોકે, અફઘાનિસ્તાન બેટિંગ યુનિટને મજબૂત કરવાની જરૂર છે, કારણ કે રહેમાનુલ્લા ગુરબાઝ સિવાય કોઈ સતત પ્રભાવશાળી પ્રદર્શન આપી શક્યું નથી. ઇકરામ અલીખિલ, અઝમતુલ્લાહ ઓમરઝાઈ અને હશમથુલ્લાહ શાહિદીએ મજબૂત પ્રદર્શન નોંધાવ્યું હતું. પાકિસ્તાન 50 ઓવરના ફોર્મેટમાં અફઘાનિસ્તાન સામે 7-0થી આગળ છે.
અફઘાનિસ્તાન ટીમ : હશમતુલ્લાહ શાહિદી (c), રહેમાનુલ્લાહ ગુરબાઝ (wk), ઇબ્રાહિમ ઝદરાન, રિયાઝ હસન, રહેમત શાહ, નજીબુલ્લાહ ઝદરાન, મોહમ્મદ નબી, ઇકરામ અલીખિલ (wk), અઝમતુલ્લા ઓમરઝાઈ, રાશિદ ખાન, મુજીબ ઉર રહેમાન, નૂર અહમદ, ફઝલહક ફારૂકી, અબ્દુલ રહેમાન અને નવીન ઉલ હક.
પાકિસ્તાન ટીમ : બાબર આઝમ (c), શાદાબ ખાન, ફખર ઝમાન, ઇમામ-ઉલ-હક, અબ્દુલ્લા શફીક, મોહમ્મદ રિઝવાન (wk), સઉદ શકીલ, ઇફ્તિખાર અહેમદ, સલમાન અલી આગા, મોહમ્મદ નવાઝ, ઉસામા મીર, હરિસ રઉફ, હસન અલી, શાહીન આફ્રિદી અને મોહમ્મદ વસીમ.
