સુપર સ્પ્રેડર અટકાવવામાં સુપર કામગીરી કરનારા SP હરેશ દૂધાત કોરોનાને મ્હાત આપી ડ્યૂટી પર પરત ફર્યા

કોરોના વાયરસનો કહેર હજુ યથાવત જ છે. કોરોના વૉરિયર્સ પણ કોરોનાથી સંક્રમિત થયાં છે. ત્યારે અમદાવાદ અને સુરતમાં કોરોનાના કેસ વધતાં સુપર સ્પ્રેડર અટકાવવા અને કેસ પર નિયંત્રણ લાવવા SP હરેશ દૂધાતને જવાબદારી સોંપવામાં આવી હતી. હવે SP હરેશ દૂધાત પણ પોઝિટિવ થયાં બાદ કોરોનાને મ્હાત આપીને પરત ફર્યાં છે.

અમદાવાદઃ અમદાવાદ શહેરમાં અને સુરતમાં કોરોના વાયરસના કેસમાં શરૂઆતમાં ખૂબ જ વધારો થઈ રહ્યો હતો. સુપર સ્પ્રેડર પણ વધી રહ્યાં હતાં ત્યારે જે તે સમયના સીઆઇડી ક્રાઇમના SP હરેશ દૂધાતને કોરોનાના કેસો પર નિયંત્રણ લાવવા માટે તથા સુપર સ્પ્રેડર અટકાવવા માટે જવાબદારી સોંપાઈ હતી. અમદાવાદમાં શહેરના પૂર્વ વિસ્તારમાં SP હરેશ દૂધાતે જવાબદારી નિભાવી હતી. જેના કારણે કેસોમાં સારું એવું નિયંત્રણ જોવા મળ્યું હતું. જે બાદ સુરતમાં પણ કેસ વધતાં સુરતના વરાછા અને તેના આસપાસના વિસ્તારોમાં પણ હરેશ દૂધાતે નિયંત્રણ લાવવા માટે અનેક પગલાં ભર્યા હતાં જે બાદ કેસો પર નિયંત્રણ જોવા મળ્યું હતું.

સુપર સ્પ્રેડર અટકાવવામાં સુપર કામગીરી કરનાર SP હરેશ દૂઘાત કોરોનાને મ્હાત આપી ડ્યૂટી પર પરત

આ દરમિયાન હરેશ દૂધાતની સીઆઇડી ક્રાઇમમાંથી પોલીસ તાલીમ કેન્દ્ર કરાઈ ખાતે બદલી થઈ હતી. જેથી તેમણે તેનો ચાર્જ સંભાળ્યો હતો. ત્યારે ચાર્જ સંભાળ્યાના 20 દિવસ બાદ તેમને રિપોર્ટ કરાવ્યો હતો. ત્યારે તેમનો કોરોનાનો રિપોર્ટ પોઝિટિવ આવ્યો હતો જેથી તેમના પરિવારનો પણ રિપોર્ટ કરાવ્યો હતો તેમાં તેમની પત્ની પણ કોરોના પોઝિટિવ આવ્યાં હતાં. પતિપત્ની બંને કોરોનાથી સંક્રમિત થતાં બન્નેને સારવાર માટે ઘરે જ સેલ્ફ ક્વોરન્ટીન કરવામાં આવ્યાં હતાં.. બંનેએ ખૂબ જ કાળજી રાખીને કોરોના સામેની લડતમાં જીત મેળવી હતી. સરકારના આરોગ્ય મંત્રાલય તરફથી પણ તેમને અન્ય દર્દીઓની જેમ યોગ્ય સારવાર મળી હતી.

પોઝિટિવ આવ્યો તે દરમિયાનના અનુભવ અંગે ETV ભારત સાથેની વાતચીતમાં એસપી હરેશ દtધાતે જણાવ્યું હતું કે તેમને પોઝિટિવ આવ્યો ત્યારે તેઓ જરા પણ ડર્યાં ન હતાં. તેમની સાથે રહેતાં તમામ લોકોને તકેદારી રાખવા જણાવ્યું હતું અને શંકા જણાય તો રિપોર્ટ કરવા માટે જણાવ્યું હતું. પોઝિટિવ આવ્યાં બાદ નિયમિત રીતે તેઓ વિટામીન c મળી રહે તે માટેની દવા અને ગરમ પાણીનું સેવન કરતાં હતાં. આ ઉપરાંત ખાવાપીવાની બાબતમાં પણ ધ્યાન રાખતાં હતાં. આસપાસના લોકો પૈકી કેટલાક લોકો તેમની મદદ કરતાં હતાં જ્યારે કેટલા લોકો ડરના કારણે દૂર રહેતાં હતાં.SP દૂધાતે જણાવ્યું હતું કે કેટલાક લોકો પોઝિટિવ આવ્યાં બાદ દર્દીએ સાથે તુચ્છ વર્તન કરે છે તે ખરેખર ન કરવું જોઈએ તથા એમને સહયોગ આપવો જોઈએ. જેથી દર્દીમાં પોઝિટિવ એનર્જી ઉભી થાય અને દર્દી જલદી સ્વસ્થ થઈ શકે.કોરોનાને મ્હાત આપીને પરત ફરનાર SP હરેધ દૂધાતને સલામ છે કે જેમણે કોરોનાના કપરા કાળમાં કેસો પર નિયંત્રણ લાવવા ફરજ નિભાવી અને હજુ પણ તેમને જે જવાબદારી સોંપવામાં આવશે તે નિભાવવા તૈયાર જ છે.