આગામી સ્થાનિક સ્વરાજ્યની ચૂંટણીઓને લઈને ભાજપ જિલ્લા સંગઠનની બેઠક પૂર્ણ

ભારતીય જનતા પાર્ટીએ સ્થાનિક સ્વરાજ્યની ચૂંટણીઓને લઇને તૈયારીઓનો આરંભ કરી દીધો છે. ભાજપના પ્રદેશ કાર્યાલય કમલમ ખાતે બેઠકનો દોર અટકયો છે, ત્યારે ગુજરાતના વિવિધ જિલ્લાઓમાં ભાજપના જિલ્લા સંગઠન જે-તે જિલ્લાની જિલ્લા પંચાયત, નગરપાલિકા, તાલુકા પંચાયતોની ચૂંટણીઓ જીતવા માટે વ્યૂહરચના બનાવવા માટે સક્રિય થયા છે.

• સ્થાનિક સ્વરાજ્યની ચૂંટણીઓ જીતવા ભાજપના જિલ્લા સંગઠનો તૈયાર
• અમદાવાદ જિલ્લાની બેઠક યોજાઈ
• વાસણા APMC ખાતે 2 દિવસમાં કુલ 6 બેઠક યોજાઇ

અમદાવાદ: ભારતીય જનતા પાર્ટીએ સ્થાનિક સ્વરાજ્યની ચૂંટણીઓને લઇને તૈયારીઓનો આરંભ કરી દીધો છે. ભાજપના પ્રદેશ કાર્યાલય કમલમ ખાતે બેઠકનો દોર અટકયો છે, ત્યારે ગુજરાતના વિવિધ જિલ્લાઓમાં ભાજપના જિલ્લા સંગઠન જે-તે જિલ્લાની જિલ્લા પંચાયત, નગરપાલિકા, તાલુકા પંચાયતોની ચૂંટણીઓ જીતવા માટે વ્યૂહરચના બનાવવા માટે સક્રિય થયા છે.

અમદાવાદ જિલ્લાની બેઠકમાં જિલ્લા પ્રભારી રમીલા બારા અને શંકર ચૌધરી ઉપસ્થિત

અમદાવાદ જિલ્લામાં જિલ્લા પ્રભારી શંકર ચૌધરી અને સાંસદ રમીલા બારાની આગેવાનીમાં ગત 2 દિવસથી વાસણા APMC ખાતે જિલ્લાના હોદ્દેદારોની બેઠક યોજાઈ રહી છે. જેમાં મંડળના પ્રમુખ, જિલ્લા મોરચાના હોદેદ્દારો, ભાજપ મીડિયા સંગઠન, સંકલન સમિતિ અને બૃહદ સંકલન સમિતિનો સમાવેશ થાય છે.

અમદાવાદ ભાજપ જિલ્લા અધ્યક્ષ હર્ષદગીરી ગોસ્વામીએ કાર્યકરોને માર્ગદર્શન આપ્યું

આ બેઠકમાં પેજ કમિટીના કાર્યના નિર્માણ પર ભાર આપવા કાર્યકરોને જિલ્લા અધ્યક્ષ હર્ષદગીરી ગોસ્વામીએ જણાવ્યું હતું. તેમજ આગામી ચૂંટણીઓને લઇને કાર્યકરો વચ્ચે લક્ષ્ય નક્કી કરવામાં આવ્યું હતું.

કૃષિ સુધાર કાયદાની અસર ચૂંટણીઓમાં નહીં થાય

ભાજપના અમદાવાદ જિલ્લાના પ્રમુખ હર્ષદગીરી ગોસ્વામીએ જણાવ્યું હતું કે, ગુજરાત અને અમદાવાદમાં કૃષિ સુધાર કાયદાને લઇને વિરોધ નહિવત છે. જેથી સ્થાનિક સ્વરાજ્યની ચૂંટણીઓમાં આ કાયદાને લઈને કોઈ પણ પ્રકારની નકારાત્મક અસર જોવા મળશે નહીં.