અરજદાર અશ્વિન રાઠોડ દ્વારા જે પોસ્ટલ બેલેટને પુરાવવા તરીકે રજૂ કરવામાં આવ્યા હતા. એ મુદ્દે ભુપેન્દ્ર ચુડાસમાના વકીલ દ્વારા લેખિત એફિડેવિટ રજૂ કરવામાં આવશે. અગાઉ કોર્ટે આપેલા ચુકાદામાં આ મુદ્દે ગુંજાશ બાકી રાખતા અશ્વિન રાઠોડ દ્વારા કોર્ટમાં રજૂ કરાયેલા નવા પુરાવા પર ચૂંટણી અધિકારી ધવલ જાનીની ઉલટ તપાસની માંગ કરતા કોર્ટે એસ.વી રાજુને ધવલ જાની ઉલટ તાપસમાં સહયોગ કરશે કે નહીં એ મુદે લેખિતમાં એફિડેવિટ રજૂ કરવાનો આદેશ કર્યો હતો.
અગાઉ હાઈકોર્ટે ચૂંટણી અધિકારી ધવલ જાનીની માંગને માન્ય રાખતા અરજદાર અને ધોળકા બેઠકથી કોંગ્રેસી ઉમેદવાર અશ્વિન રાઠોડની ઉલટ તપાસ કરી હતી. જેમાં તેમણે આક્ષેપ કર્યો હતો કે, પુનઃમતગણતરીની બે વાર લેખિત વાંધા અરજી કરી હોવા છતાં ચૂંટણી અધિકારી ધવલ જાનીએ ધ્યાને લીધી નથી અને તેમની આગેવાનીમાં ચાર-પાંચ ચૂંટણી અધિકારી પોસ્ટલ બેલેટની કાઉન્ટીંગ અને રિજેક્ટ કરતા હતા.
કાયદા પ્રધાન ભુપેન્દ્રસિંહ ચુડાસમાની જીતને પડકારનાર કોગ્રેસી ઉમેદવાર અશ્વિન રાઠોડે કોર્ટમાં ઉલટ તપાસ જણાવ્યું હતું કે, તેમણે વીવીપેટની ગણતરી માટે નહીં પરતું મતની પુનઃગણતરી માટે બે વાર લેખિત અરજી કરી હતી. જેને ચૂંટણી અધિકારી ધવલ જાની દ્વારા ધ્યાને લેવામાં આવી ન હતી. ચૂંટણી અધિકારી ધવલ જાની ઉપર હતા અને તેમના ઈશારે ચાર-પાંચ અધિકારીઓ અલગ અલગ ખાનામાં બેસીને કાર્ય કરતા હતા અને દસ મત-પત્રક જે જાનીને બતાવવામાં આવ્યા હતા, તેના પર સહી ન લેવામાં આવી હોવાનો આક્ષેપ કર્યો હતો અને એજ ફોર્મ નં-20 પીટીશન સાથે બિડાણ કર્યું હોવાનો દાવો કર્યો હતો.
અગાઉ અરજદાર અશ્વિન રાઠોડે જુબાનીમાં જણાવ્યું હતું કે આખી પીટીશનમાં ચૂંટણી અધિકારી શબ્દ ધવલ જાની માટે વાપર્યું છે, અને મત-ગણતરીના કામકાજ દરમ્યાન આખો દિવસ હાજર રહ્યાં હોવાનો દાવો કર્યો હતો. ઉલ્લેખનીય છે કે, આ કેસમાં સાક્ષી તરીકે જુબાની આપવા આવેલા ચૂંટણી અધિકારી ધવલ જાનીની ભુમિકા કોર્ટને શંકાસ્પદ લાગતા તેમને પક્ષકાર તરીકે જોડવામાં આવ્યા હતા અને કોર્ટે તેમને કેસને લગતો વલણ લેખિતમાં રજૂ કરવાનો આદેશ કર્યો હતો. જેમાં તેમણે કોગ્રેસી ઉમેદવાર અને અરજદાર અશ્વિન રાઠોડની ઉલટ તપાસની માંગ કરી હતી.
અગાઉની સુનાવણીમાં ચૂંટણી પંચ તરફથી વકીલે પક્ષકાર ધવલ જાની અને વિનિતા બોહરા વિરુદ્ધ કાર્યવાહીના પગલાં લેવાં અંગે ગુજરાત અને રાજસ્થાનના મુખ્ય સચિવને પરિપત્ર લખી જાણ કરી હોવાની દલીલ કરી હતી. જેની સામે હાઇકોર્ટે કહ્યું કે, અમે ચૂંટણીને આવો કોઈ સબમિશન કરવાની ફરજ પાડી ન હતી. ચૂંટણી પંચે આ અંગે હાઇકોર્ટમાં વધુમાં કહ્યું હતું કે, મત-ગણતરીની પ્રક્રિયા અને કઈ રીતે કરવામાં આવે છે એ મામલે પરિપત્ર દેશના તમામ રાજ્યના મુખ્ય સચિવને મોકલી દેવાયા છે.
ભુપેન્દ્ર ચુડાસમાની ઈલેક્શન પીટીશન મામલે જસ્ટીસ પરેશ ઉપાધ્યાયની કોર્ટમાં ચાલતી રિર્ટનિંગ ઓફિસર ધવલ જાનીની જુબાની અને ભુમિકા શંકાસ્પદ લાગતા હાઈકોર્ટે ધવલ જાની વિરૂધ નોટીસ કાઢી હતી અને અગામી સુનાવણી દરમ્યાન પક્ષકાર તરીકે હાજર રહી તેમના પર લગાડવામાં આવેલા આક્ષેપ મુદે જવાબ રજુ કરવાનો આદેશ કર્યો હતો.
આ કેસમાં છેલ્લી ત્રણ મુદતથી રિર્ટનિંગ ચૂંટણી અધિકારી ધવલ જાનીની જુબાની ચાલી રહી હતી. જેમાં તેઓ હાઈકોર્ટ સમક્ષ યોગ્ય ખુલાસો ન કરી શકતા હાઈકોર્ટે તેમને પક્ષકાર બનાવી દીધા હતા. ધોળકા વિધાનસભા બેઠક પર રિર્ટનિંગ ઓફિસર તરીકે કાર્યરત ધવલ જાનીએ જુબાનીમાં કહ્યું હતું કે, 429 પોસ્ટલ બેલેટ મત ચૂંટણી પંચના નિયમો વિરૂધ હોવાથી તેમને રદ જાહેર કર્યા હતા.
ઉલ્લેખનીય છે કે, આ બેઠક પરથી ભાજપના ભુપેન્દ્રસિંહ ચુડાસમાનો 327 મત જેટલી પાતળી માર્જિનથી વિજય થયો હતો. અરજદાર અશ્વિન રાઠોડનો આક્ષેપ છે કે આચારસંહિતા લાગુ થયા બાદ ધોળકાના ડેપ્યુટી કલેક્ટર ગૌરાંગ પ્રજાપતિ કે જે રિર્ટનિંગ ઓફીસર બનવાપાત્ર હતા. તેમ છતાં તેમને ગેરકાયદેસર રીતે હટાવી ધવલ જાનીની નિમણુંક કરવામાં આવી હતી.
અશ્વિન રાઠોડનો બીજો આક્ષેપ છે કે, ચુંટણી પંચના નિયમો પ્રમાણે પહેલાં પોસ્ટલ બેલેટની મતગણતરી કર્યા બાદ ઈવીએમની મત-ગણતરી કરવામાં આવે છે જોકે ધોળકા વિધાનસભા બેઠકમાં નિયમનો ભંગ કરવામાં આવ્યો છે અને પાતળી માર્જિનનો અંતર જાણયા બાદ પોસ્ટલ બેલેટની મત-ગણતરી શરૂ કરવામાં આવી હતી.
