Nitin Patel vs Karshan Solanki : નીતિન પટેલના નિવેદન પર MLA કરશન સોલંકીએ બળાપો કાઢ્યો

મહેસાણા : લોકસભાની ચૂંટણી પહેલા ગુજરાતની રાજનીતિમાં ગરમાવો આવી રહ્યો છે. તાજેતરમાં પૂર્વ નાયબ મુખ્યપ્રધાન નીતિન પટેલે જાહેર મંચ પરથી વિવાદિત નિવેદન કરતાં કહ્યું કે, તમે આજકાલના આવેલા મને શીખવાડશો ? કડીમાં કયો કાર્યકર ચલે અને કયો કાર્યકર ના ચાલે એની મારા જેટલી કોઈને ખબર નહીં હોય.

નીતિન પટેલ vs કરશન સોલંકી : નીતિન પટેલના આ નિવેદન બાદ રાજકીય માહોલ ગરમાયો છે. ત્યારે આ અંગે હાલમાં જ કડીના ધારાસભ્ય કરસન સોલંકીએ વળતો જવાબ આપ્યો હતો. ધારાસભ્ય કરશન સોલંકીએ બળાપો કાઢતાં કહ્યું કે, છેલ્લા બે મહિનાથી નીતિનભાઈ મને બોલાવતા નથી. હું તો નીતિનભાઈને પગે લાગું છું પણ સાહેબ સામું પણ જોતા નથી. સાહેબ અમારી સામે ના જોવે તો અમે એમને બોલાવવાનું બંધ કર્યું.

રિસામણાના કારણ ! કરશન સોલંકીએ કહ્યું કે, બે જૂથ પડ્યા એવું મને નથી દેખાતું, એવું હોય તો નીતિનભાઈ જાણે. નીતિનભાઈ જાણતા હોય બે જૂથ પડ્યા તો એમને ખબર. અમે તો રજૂઆત કરી હતી પાલિકામાં પ્રમુખ તરીકે બેન ચાલે જ નહીં. મેં રજૂઆત કરેલી કે બેન સિવાય બીજાને પ્રમુખ બનાવો. નગરપાલિકા પ્રમુખની ચૂંટણી દરમિયાન રજૂઆત કરી ત્યારથી રિસાઈ ગયાં છે.

કરશન સોલંકીનો દાવો : નીતિનભાઈ શિખામણ ભલે આપતા પણ હું બધું શીખી બેઠેલો છું. 1985 થી ભાજપમાં છું અને ભાજપમાં રહેવાનો છું. નીતિનભાઈ બોલે છે મેં કામ કર્યું, પણ ભાજપની સરકારે બધું કર્યું છે, નગરપાલિકામાં જે કર્યું અને સરકારે કર્યું છે.