અમદાવાદ: ઉત્તરાયણના તહેવારને ધ્યાનમાં રાખીને ગુજરાત સરકારની 1962 કરૂણા એનિમલ એમ્બ્યુલન્સ સેવાઓ સજજ કરવામાં આવી છે, દર વખતે મકરસંક્રાંતિનો તહેવાર આવે ત્યારે પશુ પક્ષીઓને પતંગના દોરાથી ઇજાઓ પહોંચતી હોય છે, ત્યારે પશુ પક્ષી અંગે પણ કરુણા દાખવીને આ કરુણા એમ્બ્યુલન્સ સેવા શરૂ કરવામાં આવી છે.
રાજ્યમાં રંગીન પતંગોત્સવની ઉજવણી માટે તૈયારીઓ ચાલી રહી છે, ત્યારે ગુજરાત સરકારની 1962 કરુણા એનિમલ એમ્બ્યુલન્સ સેવા પંખી અને પ્રાણીઓની ઇમર્જન્સીમાં થાય એવા મહત્વપૂર્ણ વધારાનો સામનો કરવા માટે સજ્જ બનાવવામાં આવી છે.
છેલ્લાં કેટલાંક વર્ષોના તથ્ય અને વિશ્લેષણના આધારે, 14 જાન્યુઆરી 2025ના રોજ અંદાજે 1,476 ઈમરજન્સીના કેસ નોંધાવાની શક્યતા છે, જે સામાન્ય દિવસોમાં નોંધાતા 842 કેસોની સરખામણાએ 75.28% નો વધારો દર્શાવે છે. તેવી જ રીતે, 15 જાન્યુઆરી 2025ના રોજ 1,495 ઇમર્જન્સી કેસ થવાની શક્યતા છે, જે 77.53% નો વધારો દર્શાવે છે.
રાજ્યના મુખ્ય જિલ્લાઓ, જેમ કે અમદાવાદ, અરવલ્લી, બાનાસકાંઠા, ગાંધીનગર, મહિસાગર, નવસારી, પંચમહાલ, પાટણ, રાજકોટ, સાબરકાંઠા, સુરત, અને સુરેન્દ્રનગરમાં વિશેષ વૃદ્ધિ થવાની અપેક્ષા છે. કરુણા અભિયાન અંતર્ગત, પ્રાણી અને પંખીઓને ઝડપથી મદદ પહોંચે તે માટે 1962 એમ્બ્યુલન્સની સંખ્યા 14 અને 15 જાન્યુઆરી દરમિયાન 37 થી વધારીને 87 કરવામાં આવી છે.
નાગરિકોને અનુરોધ
નાગરિકોને અનુરોધ કરવામાં આવ્યો છે કે, હાનિકારક પતંગની દોરીનો ઉપયોગ ટાળે, સજાગ રહે, અને કોઈ પણ પ્રાણી કે પંખીની ઇમરજન્સી જણાઈ તો તરત 1962 કરુણા એનિમલ એમ્બ્યુલન્સ હેલ્પલાઈન પર જાણ કરે.
14 જાન્યુઆરી 2025ના રોજ પંખી સંકળાતા ઇમરજન્સી કેસનો આંક 685
15 જાન્યુઆરી 2025ના રોજ આંક 487 રહેવાની શક્યતા છે, આમ દર વર્ષે મકરસંક્રાંતિનો તહેવાર આવે ત્યારે પતંગના ઘાતક દોરાથી પશુ-પક્ષીઓ ઈજાગ્રસ્ત થતાં હોય છે, કેટલીક વખતે યોગ્ય સમય પર યોગ્ય સારવાર તેમને ન મળે તેથી પ્રાણીઓ અને પક્ષીઓ મૃત્યુ પામતા હોય છે. ત્યારે આ વખતે ઘાતક દોરાનો ઉપયોગ ટાળીએ અને કોઈપણ અબોલા પશુ પક્ષી ઇજાગ્રસ્ત હાલતમાં દેખાય તો તાત્કાલિક કરુણા એમ્બ્યુલન્સ હેલ્પલાઇનનો સંપર્ક કરીએ.
