નવી દિલ્હીઃ સંસદની સુરક્ષામાં ચુક મામલે આરોપીઓ સંસદ ભવનને નિશાન બનાવીને લોકશાહીને બદનામ કરવા માગતા હતા. દિલ્હી પોલીસે પટિયાલા હાઉસ કોર્ટમાં દાખલ કરેલી ચાર્જશીટમાં કહ્યું છે કે, આરોપીઓ બે વર્ષથી સંસદ પર હુમલો કરવાની યોજના બનાવી રહ્યા હતા. લગભગ એક હજાર પેઈજની ચાર્જશીટમાં દિલ્હી પોલીસે કહ્યું છે કે, આરોપીઓ સોશિયલ મીડિયા પર એકબીજાને મળ્યા હતા. આરોપીઓએ મૈસુર, ગુરુગ્રામ અને દિલ્હીમાં કુલ પાંચ બેઠકો કરી હતી. તેમની પ્રથમ મુલાકાત ફેબ્રુઆરી 2022 માં મૈસુરમાં થઈ હતી. આ કેસની સુનાવણી એડિશનલ સેશન્સ જજ હરદીપ કૌરની કોર્ટમાં 9 સપ્ટેમ્બરે એટલે કે આજે થવા જઈ રહી છે.
આપને જણાવી દઈએ કે કોર્ટે 3 ઓગસ્ટે દિલ્હી પોલીસની આ ચાર્જશીટ પર સંજ્ઞાન લીધું હતું. દિલ્હી પોલીસે આ કેસમાં 15 જુલાઈએ પૂરક ચાર્જશીટ દાખલ કરી હતી. દિલ્હી પોલીસે આરોપીઓ વિરુદ્ધ ભારતીય દંડ સંહિતાની કલમ 186, 353, 153, 452, 201, 34, 120B અને UAPAની કલમ 13, 16, 18 હેઠળ ચાર્જશીટ દાખલ કરી હતી. દિલ્હી પોલીસે 7 જૂને પ્રથમ ચાર્જશીટ દાખલ કરી હતી. પોલીસે જેમની સામે UAPAની કલમો હેઠળ ચાર્જશીટ દાખલ કરી છે તેમાં મનોરંજન ડી, લલિત ઝા, અમોલ શિંદે, મહેશ કુમાવત, સાગર શર્મા અને નીલમ આઝાદનો સમાવેશ થાય છે. દિલ્હી પોલીસે દાખલ કરેલી પ્રથમ ચાર્જશીટ લગભગ એક હજાર પાનાની છે.
આ છે મામલોઃ આપને જણાવી દઈએ કે 13 ડિસેમ્બરના રોજ બે આરોપીઓ સંસદ ભવનની વિઝિટર ગેલેરીમાંથી ચેમ્બરમાં કૂદી પડ્યા હતા, ત્યારબાદ એક આરોપી ડેસ્કની ઉપર ચડી ગયો હતો અને તેના જૂતામાંથી કંઈક કાઢ્યું હતું. જે પછી પીળો ધુમાડો નીકળવા લાગ્યો. આ ઘટના બાદ ગૃહમાં હંગામો મચી ગયો હતો, પરંતુ આ દરમિયાન કેટલાક સાંસદોએ આ યુવકોને પકડી લીધા હતા અને મારપીટ પણ કરી હતી. થોડા સમય બાદ સંસદના સુરક્ષાકર્મીઓએ બંને યુવકોને પકડી લીધા હતા. સંસદની બહાર બે લોકો પણ પકડાયા હતા, જેઓ સૂત્રોચ્ચાર કરતી વખતે પીળો ધુમાડો ફેંકી રહ્યા હતા.
