Road accident at Rangapara: ভাৰতীয় সেনাৰ গাড়ীৰ খুন্দাৰ আহত বেংকৰ সুৰক্ষাকৰ্মী

শোণিতপুৰ জিলাৰ ৰঙাপৰাৰ হাতীবাৰীত সংঘটিত হয় এক পথ দুৰ্ঘটনা (Road accident at Rangapara)। ভাৰতীয় সেনাৰ গাড়ীৰ আৰু এখন মটৰ চাইকেল আৰোহী এগৰাকীৰ মাজত সংঘটিত হয় এক মুখামুখি সংঘৰ্ষ ৷ ফলত গুৰুত্বৰভাৱে আহত হয় এজন মটৰ চাইকেল আৰোহী ৷ মটৰ চাইকেল আৰোহী গৰাকী ৰঙাপৰাৰ ইউকো বেংকত সুৰক্ষাকৰ্মী হিচাপে কৰ্মৰত তৰুণ শইকীয়া বুলি জানিব পৰা গৈছে ৷ জানিব পৰা মতে, জামুগুৰিহাটৰ পৰা এ এছ ০১ এ এম ৭১২৩ নম্বৰৰ মটৰ চাইকেলখন বালিপৰা-ৰঙাপৰা লোক নিৰ্মাণ বিভাগৰ পথচোৱাৰে ৰঙাপৰাৰ দিশে থকা অৱস্থাতে বিপৰীত দিশৰ পৰা আহি থকা ভাৰতীয় সেনা বাহিনীৰ এখন গাড়ীৰ সৈতে মুখামুখি সংঘৰ্ষ হয় ৷ ফলত তৰুণ শইকীয়া মটৰ চাইকেলখনৰ পৰা পথৰ ওপৰত বাগৰি পৰে । ইফালে তেজেৰে ৰঙালী হৈ পৰা লোকজনক ৰঙাপৰা আৰক্ষীয়ে উদ্ধাৰ কৰি ৰঙাপৰাৰ প্ৰাথমিক স্বাস্থ্য কেন্দ্ৰলৈ চিকিৎসাৰ বাবে প্ৰেৰণ কৰে ৷ তথ্য অনুসৰি, এই ঘটনা সন্দৰ্ভত আৰক্ষীৰ তদন্ত অব্যাহত ৰাখিছে ৷