গুৱাহাটীত অশোধিত খোৱাৰ পানীৰ ৰমৰমীয়া বেহা অসাধু চক্ৰৰ

গীতানগৰৰ অম্বিকাগিৰী নগৰত থকা বেইলি(Bailley) কোম্পানীৰ নাম লৈ গুৱাহাটীত অসাধু চক্ৰই চলাইছে খোৱা পানীৰ ৰমৰমীয়া ব্যৱসায় । এটা অসাধু চক্ৰই বজাৰে-বজাৰে বিক্ৰী কৰিছে অশোধিত পানী । ইতিমধ্যে এই সন্দৰ্ভত বেইলি কৰ্তৃপক্ষৰ তৰফৰ পৰা নিজাববীয়াকৈ অনুসন্ধান কৰি এনে এটা চক্ৰক ধৰা পেলাবলৈ সক্ষম হৈছে ৷ বেইলি কৰ্তৃপক্ষৰ অভিযোগৰ ভিত্তিত নুনমাটি আৰক্ষীয়ে অভিযান চলাই ২০ লিটাৰৰ ৫ টা বেইলিৰ ছিল লগোৱা পানীৰ বটল আৰু ৪০ টা অন্য কোম্পানীৰ পানীৰ বটল জব্দ কৰে । তদুপৰি নুনমাটি নিজৰাপাৰ অঞ্চলৰ পৰা 'নিজৰা' নাম দি দীৰ্ঘদিন ধৰি খোৱা পানীৰ অবৈধ ব্যৱসায় চলাই অহা দুজন লোককো আটক কৰিছে আৰক্ষীয়ে ৷ আটকাধীন লোক কেইজন ক্ৰমে, আব্দুল কৰিম আৰু জাকিৰ হুছেইন ৷ ৮০১/২১ নম্বৰত এক গোচৰ ৰাজু কৰি তদন্ত পক্ৰিয়া অব্যাহত ৰাখিছে নুনমাটি আৰক্ষীয়ে ।