বাক্সাত দুজনকৈ বাইক চোৰ ধৃত; উদ্ধাৰ বাইক আৰু স্কুটি

বাক্সা জিলাৰ বৰবৰীত বুধবাৰৰ নিশা আটক দুটাকৈ বাইক চোৰ ৷ বাক্সা জিলাৰ বৰমা আৰক্ষীয়ে এক গোপন সূত্ৰৰ পম খেদি বৰবৰী থানাৰ অন্তৰ্গত বাহজানীয়াৰ পৰা এখনকৈ বাইক আৰু স্কুটি সহ দুটা চোৰক কৰায়ত্ব কৰে ৷ ধৃত চোৰ দুটা ক্ৰমে কমল কলিতা আৰু জগদ্বীশ মেধি ৷ আৰক্ষীয়ে প্ৰকাশ কৰা মতে, পূৰ্বৰে পৰাই ধৃত চোৰ দুটাই বিভিন্ন ঠাইৰ পৰা গাড়ী চুৰ কৰি বিক্ৰী কৰি আহিছিল ৷ উদ্ধাৰ কৰা বাহনৰ এখন বাইকৰ চুৰিৰ গোচৰ ইতিমধ্যে দিশপুৰ আৰক্ষী থানাত আৰু স্কুটিখনৰ চুৰিৰ গোচৰ পল্টনবজাৰ আৰক্ষী থানাত ৰুজু আছে বুলি উল্লেখ কৰিলে বৰমা আৰক্ষী থানাৰ ভাৰপ্ৰাপ্ত বিষয়া নিতুমনি গোস্বামীয়ে ৷