ভোটগ্ৰহণৰ মাজতে চিৰাঙৰ ভোটকেন্দ্ৰত আৰক্ষীৰ শূণ্যলৈ গুলী

বিটিচি নিৰ্বাচনৰ দ্বিতীয় পৰ্যায়ৰ ভোটগ্ৰহণৰ মাজতে বৃহস্পতিবাৰে চিৰাঙৰ দত্তপুৰ এল পি স্কুল ভোটকেন্দ্ৰত সৃষ্টি হয় উত্তপ্ত পৰিস্থিতি ৷ এজন প্ৰিজাইডিং অফিচাৰে এগৰাকী বৃদ্ধ ভাটাৰক ভোটদানৰ সময়ত সহায় কৰাক লৈ অসন্তুষ্ট একাংশ লোকে সৃষ্টি কৰে হুলস্থুলীয়া পৰিৱেশৰ ৷ প্ৰিজাইডিং অফিচাৰকে ধৰি কৰ্তব্যৰত বিষয়াক শাৰীৰিকভাৱে অপদস্থ কৰে ক্ষুব্ধ লোকসকল ৷ পৰিস্থিতি নিয়ন্ত্ৰণৰ বাবে শূন্যলৈ গুলীচালনা কৰে আৰক্ষীয়ে ৷ পৰৱৰ্তী সময়ত ঘটনাস্থলীত আৰক্ষী শীৰ্ষ বিষয়া উপস্থিত সমগ্ৰ ঘটনা বুজ লোৱাৰ লগতে পুনৰ ভোটদান আৰম্ভ কৰে ৷ উল্লেখ্য যে, কোকৰাঝাৰ আৰু চিৰাং জিলাত পুৱাৰে পৰা অব্যাহত আছে বিটিচি নিৰ্বাচনৰ দ্বিতীয় পৰ্যায়ৰ ভোটগ্ৰহণ প্ৰক্ৰিয়া । চিৰাং জিলাৰ সাতটা পৰিষদীয় সমষ্টিত মুঠ 3,71,031 গৰাকী ভোটাৰে মুঠ 34 গৰাকী প্ৰাৰ্থীৰ ভাগ্য নিৰ্ণয় কৰিব ৷ জিলাখনৰ 456 টা ভোট গ্ৰহণ কেন্দ্ৰত ভোটদান প্ৰক্ৰিয়া চলি আছে ৷