ডিগবৈ চাৰিআলি বজাৰত মাৰ্ঘেৰিটা মহকুমা প্ৰশাসনৰ উচ্ছেদ অভিযান

শুকুৰবাৰে তৈলনগৰী ডিগবৈ চহৰৰ চাৰিআলি বজাৰত চলিল মাৰ্ঘেৰিটা মহকুমা প্ৰশাসনৰ উচ্ছেদ অভিযান । ডিগবৈ চহৰৰ মূল চাৰিআলি বজাৰৰ ৩৮ নং ৰাষ্ট্ৰীয় ঘাইপথৰ কাষৰ পদপথ বেদখল কৰি স্থাপন কৰা দোকানবোৰ এফালৰ উচ্ছেদ কৰিলে প্ৰশাসনে । একাংশ ব্যৱসায়ীয়ে দীৰ্ঘ দিন ধৰি পদপথতে দোকান খুলি ৰাখিছিল । ফলত চাৰিআলি বজাৰত তীব্ৰ যানজঁটৰ সৃষ্টি হোৱাৰ লগতে সঘনাই দুৰ্ঘটনা সংঘটিত হৈ আহিছে । সেয়ে, প্ৰশাসনে শুকুৰবাৰে এই দোকানবোৰ উচ্ছেদ কৰে । মাৰ্ঘেৰিটা মহকুমাৰ দণ্ডাধীশ প্ৰান্ত প্ৰতীম পাত্ৰৰ নেতৃত্বত চলা অভিযানত ব্যৱসায়িক প্ৰতিষ্ঠানবোৰ ভাঙি পেলোৱাৰ লগতে পদপথ দখল কৰি বিক্ৰী কৰি থকা সামগ্ৰীবোৰো প্ৰশাসনে জব্দ কৰে । পুনৰ পদপথ অবৈধভাৱে দখল কৰি ব্যৱসায় আৰম্ভ কৰিলে কঠোৰ ব্যৱস্থা গ্ৰহণ কৰিব বুলি সকীয়াই দিয়ে দণ্ডাধীশ গৰাকীয়ে ।