সোণাৰিত ২৬ লাখ ৭০ হাজাৰ টকা মূল্যৰ ড্ৰাগছ দাহ

শনিবাৰে চৰাইদেউ জিলাৰ সোণাৰিত ২৬ লাখ ৭০ হাজাৰ টকা মূল্যৰ নিচাজাতীয় সামগ্ৰী দাহ কৰিলে ৰাজহ আৰু দুৰ্যোগ ব্যৱস্থাপনা মন্ত্ৰী যোগেন মহনে । চৰাইদেউ জিলা আৰক্ষীয়ে বিগত দুটা বছৰত জব্দ কৰা কোকেইন, গাঞ্জা আদিকে ধৰি অবৈধ নিচাজাতীয় সামগ্ৰী শনিবাৰে আনুষ্ঠানিকভাৱে দাহ কৰা হয় । মন্ত্ৰী যোগেন মহনে জানিবলৈ দিয়া মতে, শনিবাৰে দাহ কৰা প্ৰায় ২৬ লাখ ৭০ হাজাৰ টকা মূল্যৰ নিচাজাতীয় সামগ্ৰীখিনিৰ ভিতৰত ২৮৭.০১ গ্ৰাম ব্ৰাউন চুগাৰৰ আনুমানিক মূল্য ২০ লাখ টকা । লগতে ড্ৰাগছ বিৰোধী অভিযান অব্যাহত থাকিব বুলিও তেওঁ মন্তব্য কৰে । ইফালে, মুখ্যমন্ত্ৰীৰ ড্ৰাগছমুক্ত অসম গঢ়াৰ সপোন বাস্তৱায়িত কৰাৰ বাবে আৰক্ষীয়ে ড্ৰাগছৰ ক'লা বেহাৰ বিৰুদ্ধে অভিযান চলাই যাব বুলি মন্তব্য কৰে আৰক্ষী অধীক্ষক সুধাকৰ সিঙে ।