নিচামুক্তি অভিযানত ৰাজ্য চৰকাৰক সহায় কৰিব কেন্দ্ৰই

অসম চৰকাৰে চলাই থকা ড্ৰাগছ বিৰোধী অভিযান এক সময়োচিত পদক্ষেপ আৰু নিচাসক্ত সকলক স্বাভাৱিক অৱস্থালৈ ঘূৰাই অনাৰ ক্ষেত্ৰত কেন্দ্ৰীয় চৰকাৰে ৰাজ্য চৰকাৰক পূৰ্ণ সহযোগ আগবঢ়াব । গুৱাহাটীত আজি এইদৰে মন্তব্য কৰে কেন্দ্ৰীয় সামাজিক ন্যায় আৰু সৱলীকৰণ দপ্তৰৰ মন্ত্ৰী ডঃ বীৰেন্দ্ৰ কুমাৰে । দুদিনীয়া অসম আৰু মেঘালয় ভ্ৰমণসূচী লৈ আজি আহি গুৱাহাটীত উপস্থিত হোৱা কেন্দ্ৰীয় মন্ত্ৰী গৰাকীয়ে ৰাজ্যৰ সমাজ কল্যাণ বিভাগৰ অধীনত চলি থকা বিভিন্ন আচনিৰ বুজ লয় । বিভাগীয় মন্ত্ৰী অজন্তা নেওগ, বিভাগীয় শীৰ্ষ বিষয়া আৰু বিভিন্ন এন জি অ'ৰ প্ৰতিনিধিৰ সৈতেও অসম প্ৰশাসনিক পদাধিকাৰী মহাবিদ্যালয়ত আলোচনাত মিলিত হয় মন্ত্ৰী গৰাকী । পিছত সাংবাদিকৰে হোৱা বাৰ্তালাপত কেন্দ্ৰীয় মন্ত্ৰীগৰাকীয়ে কয় যে দিব্যাংগ সকলৰ সৱলীকৰণৰ বাবে ইতিমধ্যে তেওঁৰ বিভাগে ৩৮০ কোটি টকা মোকলাই দিছে । দিব্যাংগক আত্মনিৰ্ভৰ কৰি তোলাৰ ক্ষেত্ৰত বিশেষ ভাৱে গুৰুত্ব দিয়া হৈছে । সমগ্ৰ দেশত দিব্যাংগ সকলক বিভিন্ন প্ৰশিক্ষণ দিয়াৰ বাবে এহেজাৰটা শিবিৰ মুকলি কৰা হৈছে বুলিও তেওঁ কয় ৷