দুলীয়াজানত বিশেষভাৱে সক্ষম ছাত্ৰ-ছাত্ৰীৰ সৈতে সাংস্কৃতিক অনুষ্ঠানত অংশগ্ৰহণ জুবিন গাৰ্গৰ

ডিব্ৰুগড়, ১১ জানুৱাৰী : দুলীয়াজানৰ বিশেষভাৱে সক্ষম ছাত্ৰ-ছাত্ৰীসকলৰ বিদ্যালয় মৃণালজ্যোতি পুনৰ্বাসন কেন্দ্ৰৰ সাহাৰ্যাথে যুৱ প্ৰজন্মৰ হাৰ্টথ্ৰব, জনপ্ৰিয় শিল্পী জুবিন গাৰ্গৰ সাংস্কৃতিক অনুষ্ঠান । মৃণালজ্যোতি পুনৰ্বাসন কেন্দ্ৰৰ ৰূপালী জয়ন্তী বৰ্ষ উপলক্ষে বুধবাৰে সন্ধিয়া দুলীয়াজান বিহুতলী প্ৰাংগণত অনুষ্ঠিত সাংস্কৃতিক অনুষ্ঠানত অংশগ্ৰহণ কৰে জনপ্ৰিয় শিল্পী জুবিন গাৰ্গে । 

বিশেষভাৱে সক্ষম ছাত্ৰ-ছাত্ৰীসকলৰ সৈতে মত বিনিময় কৰাৰ লগতে জুবিন গাৰ্গে তেওঁলোকক উৎসাহিত কৰিবলৈ গাই গ'ল এটাৰ পাচত আন এটা গীত । এই অনুষ্ঠানত অংশগ্ৰহণ কৰি জুবিন গাৰ্গে কয়, ‘‘বিশেষভাৱে সক্ষমসকলৰ কাৰণে মই আগতেও কাম কৰিছো ৷ তেওঁলোকৰ কাৰণে সদায়েই আছো আৰু থাকিম । বিশেষভাৱে সক্ষমসকলৰ কাৰণে যিমান পাৰো সহায় সহযোগিতা আগবঢ়াই যাম’’ ।

লগতে তেওঁ কয়, ‘‘দুলীয়াজানলৈ আহি মোৰ ভাল লাগে ৷ দুলীয়াজান, ডিব্ৰুগড়, তিনিচুকীয়া, যোৰহাট এনেও আহি ভাল লাগে । আপোন যেন লাগে । দুলীয়াজানত এটা চিনেমা হল লাগে । চিনেমা হল হ’লেহে আৰু চিনেমা বনাবলৈ মন যাব’’ ।

লগতে পঢ়ক : মাজুলীত কুঁৱলীৰ বাবে ফেৰী চলাচলত বাধা