Qawwali Performance in Guwahati: গুৱাহাটীত কাৱালী অনুষ্ঠান পৰিবেশন প্ৰখ্যাত ৱাৰ্ছি ব্ৰাদাৰ্ছৰ

গুৱাহাটী,১৯ ফেব্ৰুৱাৰী: ভাৰতৰ সংগীত বৈভৱৰ অন্যতম অংগ কাৱালী পৰিৱেশন কৰি গুৱাহাটীৰ সংস্কৃতিপ্ৰেমী দৰ্শকৰ মৰম বুটলিবলৈ সক্ষম হ’ল খ্যাতনামা কাৱালী শিল্পী 'ৱাৰ্ছি ব্ৰাদাৰ্ছ'(Qawwali Performance in Guwahati) । ভাৰত চৰকাৰৰ সাংস্কৃতিক মন্ত্ৰণালয়ৰ সহযোগত গুৱাহাটীৰ পানীখাইটিস্থিত অসম ডাউন টাউন বিশ্ববিদ্যালয় আৰু সামাজিক সাংস্কৃতিক অনুষ্ঠান স্পিক-মেক, গুৱাহাটী চেপ্তৰৰ যৌথ উদ্যোগত গুৱাহাটীত ১৭ আৰু ১৮ ফেব্ৰুৱাৰীত দুদিনীয়াকৈ আয়োজন কৰে 'শ্ৰুতি-অমৃত' শীৰ্ষক এক সাংস্কৃতিক অনুষ্ঠান (Warshi Brothers cultural program in Guwahati) । 

অনুষ্ঠানৰ প্ৰথম দিনাৰ মুখ্য আকৰ্ষণ আছিল প্ৰসিদ্ধ শিল্পী ৱাৰ্ছি ব্ৰাদাৰ্ছৰ কাৱালী গীত । অসম ডাউন টাউন বিশ্ববিদ্যালয়ৰ এম্পি থিয়েটাৰত অনুষ্ঠিত এই সংগীত অনুষ্ঠানত বিশ্ববিদ্যালয়ৰ ছাত্ৰ-ছাত্ৰীৰ লগতে বাহিৰৰ ভালেমান সংস্কৃতি প্ৰেমী দৰ্শকে ৱাৰৰ্ছি ব্ৰাদাৰ্ছৰ সংগীত উপভোগ কৰি মন্ত্ৰ মুগ্ধ হৈ পৰে । দৰ্শকৰ অনুৰোধত ৱাৰৰ্ছি ব্ৰাদাৰ্ছ ভাতৃদ্বয়ে পৰিৱেশন কৰে এটাৰ পিছত আনটো জনপ্ৰিয় কাৱালী । 

ৱাৰ্ছি ব্ৰাদাৰ্ছে বিশ্ববিদ্যালয় খনৰ পৰিৱেশ, অতিথি সেৱা আৰু দৰ্শকৰ আনন্দ উৎসাহ দেখি অভিভূত হৈ পৰে । পুনৰ গুৱাহাাটীত অনুষ্ঠান পৰিৱেশনৰ আগ্ৰহ আগ্ৰহ প্ৰকাশ কৰে তেওঁলোকে । আনহাতে উক্ত, সংগীতানুষ্ঠানৰ আন এটা আকৰ্ষণ আছিল ছিকিমৰ শিল্পীয়ে পৰিৱেশন কৰা লোকনৃত্য 'চিংঘি চাম'(Folk dance of Sikkim) । বিভিন্ন জন্তুৰ মুখা আৰু অৱয়ব প্ৰকাশ কৰা পোছাক পিন্ধি কৰা এই নৃত্যই দৰ্শকৰ পৰা ভূয়সী প্ৰসংশা লাভ কৰে । 

'শ্ৰুতি অমৃত' শীৰ্ষক শাস্ত্ৰীয় সংগীত তথা লোক সংগীত নৃত্য,বাদ্যৰ অনুষ্ঠানৰ দ্বিতীয় দিনা অৰ্থাৎ ১৮ ফেব্ৰুৱাৰীত নিশাৰ ভাগত মাছখোৱাৰ প্ৰাগজ্যোতি প্ৰেক্ষাগৃহত অনুষ্ঠান পৰিৱেশন কৰা হয় প্ৰসিদ্ধ বাঁহী বাদক পণ্ডিত হৰিপ্ৰসাদ চৌৰাচিয়াৰ বাঁহী বাদন আৰু জনপ্ৰিয় চেতাৰ বাদক ওস্তাদ চাহিদ পাৰভেজ খান চেতাৰ বাদন (Cultural night in Guwahati) । 

অনুষ্ঠানটোৰ সন্দৰ্ভত অসম ডাউন টাউন বিশ্ব বিদ্যালয়ৰ প্ৰ’ ভাইচ চেঞ্চেলৰ প্ৰণবীৰ সিঙে কয় যে, ভাৰতীয় শাস্ত্ৰীয় সংগীত ,লোকনৃত্য তথা লোকবাদ্যক আজিৰ প্ৰজন্মৰ মাজত প্ৰচাৰ কৰা আৰু ছাত্ৰ ছাত্ৰীৰ মাজত সাংস্কৃতিক সচেতনতা আৰু সংবেদনশীলতা বৃদ্ধি কৰাৰ উদ্দেশ্যে ভাৰতবৰ্ষৰ ভিন্ন প্ৰান্তত এনেধৰণৰ অনুষ্ঠান কৰি আহিছে স্পিক-মেক নামৰ অনুষ্ঠানটোৱে । স্পিক-মেক আৰু অসম ডাউন টাউন বিশ্ববিদ্যালয়ৰ যৌথ প্ৰচেষ্টাত এইবাৰ গুৱাহাটীত দুই দিনীয়া কাৰ্যসূচীৰে আয়োজন কৰা হৈছিল 'শ্ৰুতি-অমৃত' শীৰ্ষক অনুষ্ঠানটি । 

লগতে পঢ়ক: APPSC Scam Update: প্ৰতিবাদকাৰীৰ সকলো দাবী মানি লোৱাৰ আশ্বাস অৰুণাচল প্ৰদেশ চৰকাৰৰ