Ek Asom Yatra : মন্ত্ৰী পীযুষ হাজৰীকা চিণ্ডিকেটৰ মাষ্টাৰ; দুলু আহমেদ

ডিব্ৰুগড়, 4 অক্টোবৰ : "পীযুষ হাজৰীকাৰ কথাৰ মূল্য নাই ৷ সকলোৱে তেওঁক চিণ্ডিকেটৰ মাষ্টাৰ বুলি জানে ৷ ছেটেলাইট যাত্ৰাৰ অভিজ্ঞতা তেখেত সকলৰ আছে, অসম জাতীয় পৰিষদৰ নাই ৷" এই মন্তব্য অসম জাতীয় পৰিষদৰ উপ-সভাপতি দুলু আহমেদৰ ৷  

লোকসভা নিবাৰ্চনৰ প্ৰাকক্ষণত দলীয় সাংগঠনিক ভেঁটি শক্তিশালী কৰাৰ উদ্দেশ্যেৰে ধুবুৰীৰ পৰা অসম জাতীয় পৰিষদে আৰম্ভ কৰিছে এক অসম যাত্ৰা ৷ অসম জাতীয় পৰিষদৰ এই কাৰ্যসূচীক শাসক দল বিজেপিৰ মন্ত্ৰী-বিধায়ক সকলে তীব্ৰ সমালোচনা কৰি আহিছে ৷ মন্ত্ৰী পীযুষ হাজৰীকাই অসম জাতীয় পৰিষদক এটা ক্লাব বুলি কটাক্ষ কৰাৰ লগতে দলটোৰ এক অসম যাত্ৰাক কটু ভাষাৰে সমালোচনা কৰা কাৰ্যৰ প্ৰত্যুত্তৰ দিছে অসম জাতীয় পৰিষদৰ উপ-সভাপতি দুলু আহমেদে ৷ বুধবাৰে চৰাইদেউত উপস্থিত হোৱা এক অসম যাত্ৰাত অংশগ্ৰহণ কৰি অজাপৰ উপ-সভাপতিগৰাকীয়ে মন্ত্ৰী পীযুষ হাজৰীকাক তীব্ৰ সমালোচনা কৰে ৷  

দুলু আহমেদে কয় যে, পীযুষ হাজৰীকা চিণ্ডিকেটৰ মাষ্টাৰ ৷ কংগ্ৰেছত থাকোতে এ চি গাড়ীত বহি কেৱল ধন সংগ্ৰহ কৰিছিল ৷ আমিতো ক্লাব পাৰ্টি ৷ ক্লাব পাৰ্টিৰ এক অসম যাত্ৰাক লৈ কিয় শংকিত হ'ব লাগে বুলি মন্তব্য কৰে দুলু আহমেদে ৷  

বিজেপিয়ে যি অমৃত কলহ যাত্ৰা আৰম্ভ কৰিছে নিৰ্বাচনত ৰাইজে সেই অমৃত কলহ বিজেপি নেতাৰ মূৰত ভাঙিব বুলিও কয় অসম জাতীয় পৰিষদৰ উপ-সভাপতি দুলু আহমেদে ৷

লগতে পঢ়ক : Ek Asom yatra:চৰাইদেউত অসম জাতীয় পৰিষদৰ এক অসম যাত্ৰা