গহপুৰত অচিনাক্ত বাহনে মহতিয়াই নিলে শ্ৰমিকক

বিশ্বনাথ,১৭ ডিচেম্বৰ: গহপুৰৰ ১৫ নং ৰাষ্ট্ৰীয় ঘাইপথত সঘনাই সংঘটিত হৈ আহিছে পথ দুৰ্ঘটনা । টকৌবাৰী, চন্দমাৰী, হেলেম, বৰঙাবাৰী আদি অঞ্চলত দৈনিক বৃদ্ধি পাইছে পথ দুৰ্ঘটনা । শনিবাৰে নিশা পুনৰ গহপুৰৰ বৰঙাবাৰীত সংঘটিত হয় এক ভয়ংকৰ পথ দুৰ্ঘটনা । অচিনাক্ত বাহনে মহতিয়াই নিলে এজন শ্ৰমিকক । থিতাতে নিহত লালুকৰ কুশল নেওগ নামৰ শ্ৰমিকজন ।  

লালুকৰ কাছজুলীৰ কুশল নেওগ নামৰ লোকজনে বৰঙাবাৰীৰ নিজৰ ভনীয়েকৰ ঘৰত থাকি হুকাজান চাহ ফেক্টৰীত শ্ৰমিক হিচাপে কাম কৰিছিল । কুশল নেওগে নিশা বৰঙাবাৰীৰ ১৫ নং ৰাষ্ট্ৰীয় ঘাইপথত পথ অতিক্ৰম কৰোঁতে এখন অচিনাক্ত বাহনে মহতিয়াই থৈ যায় । ফলত থিতাতে নিহত হয় শ্ৰমিকজন । উল্লেখ্য যে চাৰিলেনযুক্ত পথত গাড়ীসমূহৰ দৌৰাত্ম্যৰ বাবেই উক্ত ঘটনা সংঘটিত হোৱা বুলি মত প্ৰকাশ কৰে স্থানীয় ৰাইজে ।  

লগতে পঢ়ক: তেজপুৰ চকিঘাট দলঙত পথ দুৰ্ঘটনা নিহত যুৱক, মুকলিৰ পূৰ্বেই দলঙখনেৰে চলিছে যান বাহন