পাইপ ফুটাই চুৰি কৰি লৈ গ'ল তেল

গোলাঘাট, 23 নৱেম্বৰ : গোলাঘাট জিলাত সক্ৰিয় হৈ আছে তেল চুৰি চক্ৰ । নুমলীগড়ত তেল শোধনাগাৰ লিমিটেডৰ পাইপ ফুটাই তেল চুৰি চক্ৰই তেল চুৰি কৰাৰ সন্দেহ কৰিছে স্থানীয় লোকৰ লগতে গাঁওৰক্ষী বাহিনীয়ে ৷

নুমলীগড় তেল শোধনাগাৰৰ পৰা শিলিগুৰিলৈ যোৱা পাইপলাইনত সংঘটিত হৈছে এই ঘটনা । বৃহস্পতিবাৰে গাঁওৰক্ষী বাহিনীৰ এজন লোক উক্ত ঠাইত উপস্থিত হোৱাৰ পাচত তাত জাবৰৰ দ’ম প্ৰত্যক্ষ কৰে ৷ জাবৰৰ দ’ম দেখি সন্দেহ ওপজে তেওঁৰ ৷ লগে লগে বিভাগীয় কৰ্তৃপক্ষক খবৰ দিয়ে গাঁওৰক্ষী বাহিনীৰ সদস্যজনে ।

ঘটনাৰ খবৰ পাই ঘটনাস্থলীত আৰক্ষী আৰু নুমলীগড় তেল শোধনাগাৰৰ লোক উপস্থিত হৈ আৰম্ভ কৰে তদন্ত ৷ বৰ্তমানেও অব্যাহত আছে তদন্ত । নুমলীগড়ৰ ৰাংচালী চাহ বাগিচাৰ মাজত মাটিৰ তলৰে যোৱা শোধনাগাৰৰ পাইপ ফুটাই ভাল্ব স্থাপন কৰি তেল চুৰি কৰাৰ সন্দেহ কৰিছে কৰ্তপক্ষই । পূৰ্বতেও নুমলীগড় চাহ বাগিচাত এইদৰে দুষ্টচক্ৰই পাইপ ফুটাই তেল চুৰি কৰিছিল বুলি জানিবলৈ দিয়ে স্থানীয় ৰাইজে ।

লগতে পঢ়ক : Lankasi police seized tanker:খাৰুৱা তেল চুৰি কৰি থকাৰ সময়তে টেংকাৰ জব্দ লাংকাছি আৰক্ষীৰ