Snatching incident:মহানগৰীত চিলনী চোৰে মহিলাৰ পৰা কাঢ়ি নিলে লক্ষাধিক টকা

গুৱাহাটী ৭ ছেপ্টেম্বৰ: গুৱাহাটী মহানগৰীত দিনক দিনে বৃদ্ধি হৈছে চিলনী চোৰৰ উপদ্ৰৱ। কোন মুহূৰ্তত চিলনী চোৰে আপোনাৰ হাতৰ বেগ, মোবাইল, ডিঙিৰ অলংকাৰ লুটি নিয়ে তাৰ কোনো নিশ্চয়তা নাই ৷ এইবাৰ মহানগৰীৰ সাতগাঁও অঞ্চলত চিলনী চোৰে বৃহস্পতিবাৰে দিন দুপৰতে মহিলাৰ পৰা কাঢ়ি নিলে টকা ভৰ্তি বেগ। মানুহৰ সমাগমৰ মাজতে সাতগাঁও ৰাজপথত পালছাৰ মটৰ চাইকেলত অহা দুৰ্বৃত্তই এগৰাকী মহিলাৰ পৰা কাঢ়ি নিয়ে লক্ষাধিক টকা।

দিনৰ প্ৰায় ১১.৩০ মান বজাত সংঘটিত হৈছিল এই ঘটনা ৷ ইতিমধ্যে ঘটনা সন্দৰ্ভত ভুক্তভোগী মহিলাগৰাকীয়ে সাতগাঁও থানাত দাখিল কৰিছে এজাহাৰ। জানিব পৰা মতে আমচিং যোৰাবাটৰ বাসিন্দা গমা সিঙে সাতগাওঁস্থিত SBI নাৰেংগী শাখাৰ পৰা উলিয়াইছিল লক্ষাধিক টকা। টকাখিনি বেগত ভৰাই নিজ গৃহ অভিমুখে গৈ থকাৰ সময়তে সাতগাওঁ শনি মন্দিৰৰ সন্মুখত সাতগাঁও সেনা ছাউনীৰ দিশৰ পৰা নীলা ৰঙৰ পালছাৰ বাহনত অহা দুজনীয়া দুৰ্বৃত্তই কাঢ়ি লৈ যায় টকাৰ বেগটো। দুৰ্বুত্তৰ দলটোৰ টনা আজোৰাত সামান্য আঘাতপ্ৰাপ্ত হয় মহিলাগৰাকী। 

লগতে পঢ়ক: Theft incident: সুন্দৰীদিয়াৰ ভাগৱত শাস্ত্ৰ অধ্যয়নাগাৰৰ লগতে দুখনকৈ দোকানত চুৰি