Ripun Bora slams BJP: আজমলৰ কথাত বিজেপিহে উঠা-বহা কৰে, আমি নকৰো: ৰিপুন বৰা

চিৰাঙৰ বিজনীৰ সমন্বয় হোটেলৰ সভাগৃহত সোমবাৰে সন্ধিয়া অসম ৰাজ্যিক তৃণমূল কংগ্ৰেছৰ সভাপতি ৰিপুণ বৰাই (Ripun Bora press meet at Bijni)এখন সংবাদমেল সম্বোধন কৰে । এই সংবাদমেলত ৰিপুণ বৰাই (Trinamool Congress President Ripun Bora) এআইইউডিএফৰ সভাপতি বদৰুদ্দিন আজমলক তীব্ৰ সমালোচনা কৰি কয় বিজেপিৰ দিনত বদৰুদ্দিন আজমলে এআইইউডিএফ কৰি মুছলমানৰ ত্ৰাণকৰ্তাৰ ৰূপ লৈ মুছলমান ৰাইজৰ সৰ্ব্বনাশ কৰিছে । ৰাজ্যত সাম্প্ৰদায়িক বিষবাষ্প বিয়পাইছে । বিজেপিৰ কথাত উঠা-বহা কৰি নিজকে বিজেপিৰ বি-টিম বুলি পৰিচয় দিছে ৷ সেইজন আজমলৰ কথাত আমি উঠা-বহা নকৰো । তেওঁ আৰু কয় যে চৰকাৰে আইন শৃংখলা উন্নত হৈছে বুলি কৈছে কিন্তু বৃহৎ সংখ্যক যুৱক আলফালৈ কিয় গৈছে তাৰ উত্তৰ চৰকাৰে দিব পৰা নাই । মুখ্যমন্ত্ৰী ড৹ হিমন্ত বিশ্ব শৰ্মাই (CM Himanta Biswa Sarma)দুৰ্নীতিৰ তদন্ত কৰিছে । কেইজনমান কৰ্মচাৰীক উৎকোচ লোৱাৰ বাবে ধৰিছে । কিন্তু মন্ত্ৰী সকলৰ দুৰ্নীতিৰ কোনে তদন্ত কৰিব বুলিও তেওঁ প্ৰশ্ন তোলে ৷ ইফালে তেওঁ অসম ৰাজ্যিক তৃণমূল কংগ্ৰেছে গ্ৰহন কৰা কেতবোৰ কাৰ্যসূচী সংবাদমেলখনত ব্যক্ত কৰে। এই সংবাদমেলত চিৰাং জিলা তৃণমূল কংগ্ৰেছৰ সভাপতি অনিৰ্বাণ সেনসহ দলটোৰ অন্যান্য নেতাসকল উপস্থিত থাকে। সংবাদমেলৰ পূৰ্বে সমন্বয় হোটেলৰ সভাকক্ষত চিৰাং জিলা তৃণমূল কংগ্ৰেছৰ এখন কাৰ্যনিৰ্বাহক সভাও অনুষ্ঠিত হয় ।