ভাওনা সমাৰোহক লৈ উখল-মাখল মাজুলী

মাজুলী,১৩ জানুৱাৰী: অহা ১৮ জানুৱাৰী পৰা মাজুলীৰ ঐতিহাসিক আউনিআটি সত্ৰৰ মণিকাঞ্চন ৰংক্ষেত্ৰত অনুষ্ঠিত হ'ব সদৌ অসম ভাওনা সমাৰোহ ২০২৪ । এই সদৌ অসম ভাওনা সমাৰোহখনি মাজুলীৰ ঐতিহাসিক আউনিআটি সত্ৰই দুবছৰৰ মূৰে মূৰে আয়োজন কৰি আহিছে । এই ভাওনা সমাৰোহক লৈ উখল-মাখল পৰিৱেশ বিৰাজ কৰিছে ঐতিহাসিক আউনিআটি সত্ৰৰ মণিকাঞ্চন ৰংক্ষেত্ৰত ।  

এই ভাওনা সমাৰোহৰ উদ্বোধনী অনুষ্ঠানত অসমৰ বিভিন্ন প্ৰান্তৰ ১০ হাজাৰ মহিলাই একেলগে দিহানাম পৰিৱেশন কৰিব । যাৰ কাৰণে আউনিআটি সত্ৰৰ মণিকাঞ্চন ৰংক্ষেত্ৰত যোৱা শুকুৰবাৰে একেলগে ১০০০ ৰো অধিক মহিলাই দিহানামৰ অনুশীলন কৰে । এই সদৌ অসম ভাওনা সমাৰোহ ২০২৪ ৰ বাবে প্ৰস্তুতি তুংগত তুলিছে আয়োজক সমিতিয়ে । এই ভাওনা সমাৰোহ ২০২৪ত অসমৰ বিভিন্ন প্ৰান্তৰ ২০টাকৈ ভাওনাৰ দলে অংশগ্ৰহণ কৰিব ।  

দিনে দুটাকৈ ভাওনাৰ দলে ভাওনা পদৰ্শন কৰিব ভাওনা সমাৰোহখনিত । জানিবপৰা মতে এই সদৌ অসম ভাওনা সমাৰোহ ২০২৪ ৰ শুভ উদ্বোধন কৰিব অসমৰ মুখ্যমন্ত্ৰী হিমন্ত বিশ্ব শৰ্মাই । আন বছৰবোৰৰ দৰে এইবাৰো দৰ্শকৰ সঁহাৰি কামনা কৰিছে আয়োজকসকলে । 

লগতে পঢ়ক: বিবিধ পিঠা, লাড়ুৰে ভোগালীক আদৰাৰ প্ৰস্তুতি