MP Pradyut Bordoloi: বৰ বেছিদিন এটুকুৰা জুইক ফটাকানিৰে ঢাকি থ’ব নোৱাৰি- প্ৰদ্যুৎ বৰদলৈ

মৰিগাঁও, 17 আগষ্ট : জাগীৰোডত উপস্থিত হৈ বিজেপিক ক্ষুৰধাৰ সমালোচনা নগাঁৱৰ সাংসদ প্ৰদ্যুৎ বৰদলৈৰ ৷ জাগীৰোড সমষ্টিৰ যুৱ কংগ্ৰেছৰ নতুন সমিতিয়ে দায়িত্বভাৰ গ্ৰহণ কৰা হেতুকে আয়োজন কৰা হয় এক অনুষ্ঠানৰ ৷ উক্ত কাৰ্যভাৰ গ্ৰহণ অনুষ্ঠানত উপস্থিত হৈ প্ৰদ্যুৎ বৰদলৈয়ে শুভকামনা জনোৱাৰ লগতে কয় যে, কংগ্ৰেছে সদায় সকলোকে একেলগে সামৰি এখন দেশ হিচাপে আগবাঢ়ি যোৱাত গুৰুত্ব দিছে ৷

পুৰণি বিজেপি কৰ্মীৰ ক্ষোভৰ সন্দৰ্ভত সাংসদ প্ৰদ্যুত বৰদলৈয়ে মন্তব্য কৰি কয় যে, ‘যিসকল কৰ্মীয়ে নিজৰ তেজ, ঘাম, চকুপানীৰে বিজেপি দলটো তিল তিলকৈ গঢ়ি শক্তিশালী কৰিলে, সেইসকল আজি এলাগী ৷ তেওঁলোকৰ মনত পুঞ্জীভূত হৈ থকা ক্ষোভ-বেদনা উদ্গীৰণ হোৱাটো স্বাভাৱিক ৷ বৰ বেছিদিন এটুকুৰা জুইক ফটাকানিৰে ঢাকি থ’ব নোৱাৰি’, বিজেপি দলত সৃষ্টি হোৱা অন্ত:কন্দল সন্দৰ্ভত এইদৰে প্ৰতিক্ৰিয়া প্ৰকাশ কৰে সাংসদ প্ৰদ্যুৎ বৰদলৈয়ে ৷

উল্লেখ্য যে জাগীৰোডৰ কলা মন্দিৰত অনুষ্ঠিত হোৱা জাগীৰোড সমষ্টিৰ যুৱ কংগ্ৰেছ সমিতিৰ কাৰ্যভাৰ গ্ৰহণ অনুষ্ঠানত উপস্থিত থাকি নৰেন্দ্ৰ মোদী নেতৃত্বাধীন বিজেপি চৰকাৰখনে হিন্দু-মুছলমানৰ সাম্প্ৰদায়িক ৰাজনীতি চলাই অহাৰ অভিযোগ উত্থাপন কৰে কংগ্ৰেছ দলৰ নগাঁও লোকসভা সমষ্টিৰ সাংসদ প্ৰদ্যুৎ বৰদলৈয়ে ৷

লগতে পঢ়ক : Moirabari Police: কুখ্যাত অপৰাধী কামিজ উদ্দিন অৱশেষত মৈৰাবাৰী আৰক্ষীৰ জালত