Point 22 Pistol recovered: পুখুৰী সিঁচোতে মাছৰ সলনি ওলাল পিষ্টল

লাহদৈগড় আৰক্ষী চকীৰ অন্তৰ্গত চটাই ঘৰফলীয়াত বৃহস্পতিবাৰে এটা পুখুৰীত এটি পুৰণি পিষ্টল উদ্ধাৰ হয় ৷ গাঁওখনৰ কেইজনমান যুৱকে আজি গাঁৱৰে এটা পুখুৰী সিঁচি মাছ ধৰি থাকোতেই বোকাত এটা মামৰে ধৰা পিষ্টল প্ৰত্যক্ষ কৰে ৷ যুৱককেইজনে স্থানীয় লাহদৈগড় আৰক্ষীক বিষয়টো অৱগত কৰে(Lahdoigarh Police Outpost) ৷ লাহদৈগড় আৰক্ষী চকীৰ ভাৰপ্ৰাপ্ত বিষয়া গুনীন চুতীয়াৰ নেতৃত্বত আৰক্ষীৰ এটি দল লগে লগে ঘটনাস্থলীত উপস্থিত হৈ পিষ্টলটো জব্দ কৰি আৰক্ষী চকীলৈ লৈ আনে ৷ এই সন্দৰ্ভত আৰক্ষী বিষয়াজনৰ পৰা জানিব পৰা মতে পিষ্টলটো পইন্ট ২২ বুলি সন্দেহ কৰা হৈছে আৰু ইয়াৰ লগতে কাৰ্টিজবিহীন মেগজিনো পোৱা গৈছে(Point 22 Pistol recovered) ৷ পূৰ্বে কোনোৱে হয়তো নিজক বচাবৰ বাবে মৰণাস্ত্ৰটো পুখুৰীত পেলাই দিছিল আৰু পিষ্টলটোৰ অৱস্থালৈ চাই ইয়াক কেইবাবছৰ আগতে পেলোৱা হৈছিল বুলি সন্দেহ কৰা হৈছে ৷ অৱশ্যে পিষ্টলটো সম্পৰ্কত তথ্য নিশ্চিত কৰিবৰ বাবে লিগিৰিপুখুৰীত থকা বিশেষজ্ঞৰ ওচৰলৈ পিষ্টলটো পঠোৱা হ’ব বুলি জানিব পৰা গৈছে ।