Woman Found Dead in Hajo : ন-বোৱাৰীৰ ৰহস্যজনক আত্মহত্যা, তীৰ্থনগৰীত চাঞ্চল্য

গুৱাহাটী, ১৩ অক্টোবৰ : হাজোত সংঘটিত হৈছে এগৰাকী ন-বোৱাৰীৰ ৰহস্যজনক আত্মহত্যাৰ ঘটনা ৷ হাজোৰ মনাহকুছিৰ পদিয়াৰবড়ীত সংঘটিত হোৱা মণিষা দাস নামৰ ন-বোৱাৰী এগৰাকীৰ ৰহস্যজনক আত্মহত্যাৰ ঘটনাই এতিয়া চাঞ্চল্যৰ সৃষ্টি কৰিছে সমগ্ৰ তীৰ্থনগৰীত ৷  

মণিষাৰ মাতৃগৃহৰ লোকৰ অভিযোগ, মণিষাক হত্যা কৰি আত্মহত্যাৰ ৰূপ দিয়াৰ চেষ্টা কৰিছে স্বামী দ্বীপ দাস আৰু পৰিয়ালৰ লোকে ৷ স্বামীৰ পৰিয়ালে শাৰীৰিক নিৰ্যাতন চলোৱাই নহয় বিভিন্ন সময়ত যৌতুক দাবী কৰাৰো গুৰুতৰ অভিযোগ উত্থাপন কৰিছে মণিষাৰ মাতৃগৃহৰ লোকে ৷ কিয়নো স্বামীয়ে শাৰীৰিক, মানসিক অত্যাচাৰ চলোৱাৰ কথা নিজৰ পিতৃক ফোনযোগে কেইবাবাৰো জনাইছিল মণিষাই ৷

বৃহস্পতিবাৰে সংঘটিত হোৱা এই ঘটনাৰ পাছতে মণিষাৰ পিতৃয়ে হাজো আৰক্ষী থানাত দাখিল কৰিছে এখন এজাহাৰ ৷ উল্লেখ্য যে, চাৰি মাহ পূৰ্বে হাজোৰ মনাহকুছিৰ পদিয়াৰবড়ীৰ দ্বীপ দাসৰ সৈতে বিবাহপাশত আৱদ্ধ হৈছিল ওৰগালৰ মণিষাই ৷ কিন্তু বিয়াৰ ৫ মাহ নহওঁতেই হাজোত সংঘটিত এই গৰাকী ন-বোৱাৰীৰ ৰহস্যজনক মৃত্যুৰ ঘটনাই এতিয়া চাঞ্চল্যৰ সৃষ্টি কৰিছে হাজোত ৷ 

ইতিমধ্যে হাজো আৰক্ষীয়ে ঘটনা সন্দৰ্ভত গোচৰ ৰুজু কৰাৰ লগতে মণিষাৰ স্বামী দ্বীপ দাসক সোধপোচৰ বাবে আটক কৰিছে ৷ আৰক্ষীৰ তদন্তৰ লগতে মৰণোত্তৰ পৰীক্ষাৰ প্ৰতিবেদনতহে ওলাব এয়া হত্যা নে আত্মহত্যাৰ ঘটনা ৷ 

লগতে পঢ়ক : Mysterious murder in Khanapara: ৰহস্যঘন খানাপাৰাৰ হত্যাকাণ্ড; অঞ্জনৰ পত্নীৰ বিস্ফোৰক মন্তব্য