পঞ্চম পৰ্যায়ৰ গুণোৎসৱ: কাৰ্বি আংলঙৰ কেইবাখনো বিদ্যালয় পৰিদৰ্শন মন্ত্ৰী মহনৰ

ডিফু, 4 জানুৱাৰী : আজিৰে পৰা ৰাজ্যত আৰম্ভ হৈছে পঞ্চম পৰ্যায়ৰ গুণোৎসৱ ৷ পাহাৰীয়া জিলা কাৰ্বি আংলঙত প্ৰথম দিনৰ কাৰ্যসূচীত অংশগ্ৰহণ কৰে পাৰ্বত্য উন্নয়ন তথা কাৰ্বি আংলং জিলাৰ অভিভাৱক মন্ত্ৰী যোগেন মহনে ৷ ডিফুৰ চৰকাৰী বালক উচ্চতৰ মাধ্যমিক বিদ্যালয়ৰ গুণোৎসৱ কাৰ্যসূচীত উপস্থিত হৈ মন্ত্ৰী গৰাকীয়ে শিক্ষক-শিক্ষয়িত্ৰী আৰু ছাত্ৰ-ছাত্ৰীৰ সৈতে মত বিনিময় কৰে ৷

ডিফুৰ লগতে জিলাখনৰ আন দুখন বিদ্যালয়তো উপস্থিত হৈ বিদ্যালয় দুখনৰ গুণোৎসৱৰ কাৰ্যসূচীত অংশগ্ৰহণ কৰে মন্ত্ৰীগৰাকীয়ে ৷ মন্ত্ৰী যোগেন মহনে সাংবাদিকৰ সৈতে হোৱা বাৰ্তালাপত কয় যে, ৰাজ্য চৰকাৰৰ উদ্যোগত অনুষ্ঠিত হোৱা গুণোৎসৱে ৰাজ্যত গুণগত শিক্ষা ব্যৱস্থাৰ উন্নয়নৰ লগতে শৈক্ষিক বাতাৰণৰ সৃষ্টি কৰিছে ৷ 

তেওঁ কয় যে, যোৱা হাইস্কুল শিক্ষান্ত পৰীক্ষাত কাৰ্বি আংলঙে আশানুৰূপ সফলতা লাভ কৰিবলৈ সক্ষম হৈছে ৷ গুণোৎসৱৰ জৰিয়তে যি সমূহ বিদ্যালয়ে এ (A) গ্ৰেড লাভ কৰিবলৈ সক্ষম হৈছে সেই বিদ্যালয় সমূহক চৰকাৰে পুৰষ্কৃত কৰাৰ লগতে আৰ্থিক সাহাৰ্যও প্ৰদান কৰিব বুলি মন্তব্য কৰে মন্ত্ৰীগৰাকীয়ে ৷ 

লগতে পঢ়ক : ৫ জানুৱাৰীৰ পৰা খানাপাৰাত পশুধন আৰু হাঁহ-কুকুৰা মেলা