Man died due to electric shock: টীয়কত বিদ্যুৎস্পৃষ্ট হৈ এজনৰ মৃত্যু

টীয়ক, 4 আগষ্ট : টীয়কত অঘটন ৷ শুকুৰবাৰে পুৱা টীয়কৰ উত্তৰ দুলীয়া গাঁৱত বিদ্যুৎস্পৃষ্ট হৈ এজন লোকৰ মৃত্যু হয় । মৃত ব্যক্তিজনৰ নাম মইনা বৰা (48) ৷ স্থানীয় লোকে উল্লেখ কৰা অনুসৰি, শুকুৰবাৰে পুৱা মইনা বৰাই বাঁহনিত বাঁহ কাটি আছিল ৷ তেনে সময়তে কটা এডাল বাঁহ লাগি যায় উচ্চ ক্ষমতা সম্পন্ন বিদ্যুৎ পৰিবাহী তাঁৰত ৷ যাৰ ফলতে উক্ত দুৰ্ঘটনাটো সংঘটিত হয় ৷

ইপিনে ঘটনাটো সংঘটিত হোৱাৰ লগে লগে স্থানীয় ৰাইজে ততাতৈয়াকৈ আহত বৰাক টীয়ক এফ আৰ ইউলৈ লৈ যায় যদিও চিকিৎসকে মৃত ঘোষণা কৰে ব্যক্তিজনক । উল্লেখযোগ্য যে, উক্ত অঞ্চলৰে উচ্চ ক্ষমতা সম্পন্ন বিদ্যুৎ পৰিবাহী তাঁৰ পাৰ নকৰিবলৈ লগতে অন্য ফালেদি বিদ্যুৎ পৰিবাহী তাঁৰ নিবলৈ বিভাগীয় কৰ্তৃপক্ষক বাৰম্বাৰ স্থানীয় ৰাইজে দাবী জনাই আহিছে ৷

কিন্তু আজি পৰ্যন্ত বিদ্যুৎ বিভাগে ইয়াৰ কোনো ব্যৱস্থা নকৰাৰ অভিযোগ উত্থাপন হৈছে ৷ যাৰ পৰিণতিত উক্ত ঘটনাটো সংঘটিত হৈছে বুলি স্থানীয় ৰাইজে অভিযোগ তুলিছে ৷ সেয়ে অনতি পলমে উক্ত উচ্চ বিদ্যুৎ পৰিবাহী তাঁৰ স্থানান্তৰিত কৰিবলৈ পুনৰ বিদ্যুৎ বিভাগক আহ্বান জনাইছে যাতে পুনৰ এনে দুৰ্ভাগ্যজনক ঘটনা সংঘটিত নহয় ।

লগতে পঢ়ক : Wild elephants died : ৰাণীত বিদ্যুৎস্পৃষ্ট হৈ পোৱালিসহ তিনিটা বন্যহস্তীৰ মৃত্যু