Majuli ferry Services: মাজুলীলৈ পুনৰ ফেৰী চলিল; স্বস্তিৰ নিশ্বাস ৰাইজৰ

মাজুলী, 31 আগষ্ট: আজিৰে পৰা পুনৰ আৰম্ভ হ’ল অফলামুখ নিমাতী ফেৰী সেৱা । আজিৰে পৰা নিয়মীয়াভাৱে চলিব অফলামুখৰ ফেৰী সেৱা । ফেৰী সেৱা আৰম্ভ হোৱাৰ লগে লগে ব্ৰহ্মপুত্ৰ পাৰাপাৰ হ’বলৈ অফলামুখ পাৰঘাটত পুৱাই বহু যাত্ৰীয়ে ভিৰ কৰা পৰিলক্ষিত হৈছে । এই ফেৰী সেৱা বন্ধ হোৱাৰ ফলত একপ্ৰকাৰ দক্ষিণ পাৰৰ লগত সংযোগ বিচ্ছিন্ন হৈ পৰিছিল মাজুলীয়ালৰ ৷ কিন্তু আজি অৰ্থাৎ বৃহস্পতিবাৰে ফেৰী সেৱা পুনৰ মুকলি কৰি দিয়াত স্বস্তিৰ নিশ্বাস এৰিছে মাজুলীয়ালে ৷

উল্লেখ্য যে, বিগত কিছুদিন ধৰি ৰাজ্যত হৈ থকা ধাৰাষাৰ বৰষুণৰ ফলত বৃদ্ধি পাইছিল ব্ৰহ্মপুত্ৰৰ জলস্তৰ ৷ ব্ৰহ্মপুত্ৰৰ বাঢ়নী পানীয়ে বুৰাই পেলাইছিল ফেৰী ৰখোৱা ৰেম্পসমূহো ৷ ফলত দেওবাৰৰ পৰা বন্ধ হৈ আছিল মাজুলী নিমাতী ফেৰী সেৱা । অৱশ্যে ব্ৰহ্মপুত্ৰৰ জলস্তৰ হ্ৰাস পোৱাত আভ্যন্তৰীণ জল পৰিবহন বিভাগে আজিৰ পৰা অফলামুখ নিমাতী ফেৰী পুনৰ আৰম্ভ কৰাৰ সিদ্ধান্ত গ্ৰহণ কৰে ৷ অৱশ্যে আজিও বন্ধ আছে কমলাবাৰী নিমাতী ফেৰী সেৱা ।

লগতে পঢ়ক : Majuli ferry Services suspended: অনিৰ্দিষ্ট কাললৈ বন্ধ মাজুলী-নিমাতী ফেৰী সেৱা