Tense situation in Nagaon: পাকিস্তানী সদৃশ পতাকাক লৈ নগাঁৱত উত্তপ্ত পৰিস্থিতি

নগাঁও, 22 ছেপ্টেম্বৰ : শুকুৰবাৰে পুৱাই নগাঁৱৰ মোল্লাপট্টিত সৃষ্টি হয় উত্তপ্ত পৰিস্থিতিৰ । পাকিস্তানী সদৃশ এখন পতাকাক লৈ সৃষ্টি হয় এই উত্তেজনাৰ । জানিব পৰা মতে, বিগত কিছুদিন ধৰি কলিকতাৰ হামিদুৰ ৰহমান নামৰ এজন লোকে বসবাস কৰি আহিছে নগাঁৱৰ মোল্লাপট্টিত ।

মোল্লাপট্টিস্থিত বাসগৃহত হামিদুৰ ৰহমানে পাকিস্তানী সদৃশ এখন পতাকা আঁৰি থোৱাক লৈ স্থানীয় ৰাইজে শুকুৰবাৰে পুৱাই সৃষ্টি কৰে এক হুলস্থূলীয়া পৰিৱেশৰ । ক্ষুব্ধ মোল্লাপট্টিৰ ৰাইজৰ সৈতে সংঘাতত লিপ্ত হয় হামিদুৰ ৰহমান । পিচত পৰিস্থিতি অধিক উত্তপ্ত হৈ পৰাৰ খবৰ লাভ কৰাৰ লগে লগেই ঘটনাস্থলীত উপস্থিত হয় হয়বৰগাঁও আৰক্ষীৰ চকীৰ আৰক্ষীৰ এটা দল ।

অৱশেষত ৰাইজে আটক কৰা হামিদুৰক চমজি লয় আৰক্ষীৰ দলটোৱে । লগতে নিজ ঘৰতে আঁৰি থোৱা পতাকাখনো জব্দ কৰে আৰক্ষীয়ে । ইপিনে হামিদুৰ ৰহমানে ঘৰত ধৰ্মীয় অনুষ্ঠানৰ লগত সংগতি ৰাখি ইছলাম ধৰ্মীয় পতাকা আঁৰাৰ কথা উল্লেখ কৰে অভিযুক্ত হামিদুৰ ৰহমানে ।

লগতে পঢ়ক : Operation against Drugs: ডিব্ৰুগড়ত 24 ঘন্টাৰ ভিতৰত দুটা স্থানত ড্ৰাগছসহ সৰবৰাহকাৰী আটক