বুজন পৰিমাণৰ ড্ৰাগছসহ আটক এজন সৰবৰাহকাৰী

বঙাইগাঁও, ১৭ নৱেম্বৰ : বিষাক্ত ড্ৰাগছে ছানি ধৰিছে বঙাইগাঁও চহৰৰ চুক-কোণ ৷ অবৈধ ড্ৰাগছৰ ৰমৰমীয়া বেহা চলিছে বঙাইগাঁৱত । ড্ৰাগছ বিৰোধী অভিযানত পুনৰ বঙাইগাঁও চহৰৰ মাজমজিয়াত বুজন পৰিমাণৰ ড্ৰাগছসহ এজন যুৱকক আটক কৰে বঙাইগাঁও আৰক্ষীয়ে । উত্তৰ বঙাইগাঁও টহলদাৰী আৰক্ষী চকীৰ ভাৰপ্ৰাপ্ত আৰক্ষী বিষয়া সুকেশ ঘোষৰ নেতৃত্বত চলে এই অভিযান । আটকাধীন যুৱকজনৰ নাম আলী হুছেইন। ৩৫ টা ড্ৰাগছ ভৰ্তি কণ্টেনাৰ উদ্ধাৰ হয় তেওঁৰ পৰা। চাৰিদিনৰ পূৰ্বেহে ড্ৰাগছ সৰবৰাহৰ বেহাত নামিছিল বুলি জানিবলৈ দিয়ে যুৱকজনে ৷ ঘৰ বৰপেটাত বুলি জানিব পৰা গৈছে ৷ তেওঁৰ ভাষ্য অনুসৰি, বৰপেটাৰ পৰা মাফিয়াই চলাই আছে বঙাইগাঁও চহৰত ড্ৰাগছৰ এই অবৈধ বেহা । বৰপেটাৰোডৰ পৰা পুৱাৰ ভাগত বহাগী যাত্ৰীবাহী ৰে’ল যোগে প্ৰতিদিনে আহে ড্ৰাগছ সৰবৰাহকাৰী আলী। বৰপেটা ৰোডৰ আব্বাছ আলী নামৰ ড্ৰাগছ ব্যৱসায়ীজনে নামনিত বিষাক্ত ড্ৰাগছৰ বেহা চলাইছে বুলি জানিবলৈ দিয়ে আলীয়ে ৷ ইতিমধ্যে আৰক্ষীয়ে ঘটনা সন্দৰ্ভত তদন্ত আৰম্ভ কৰিছে ৷

লগতে পঢ়ক : Student involved in drug smuggling: চিন্তনীয়! এইবাৰ ড্ৰাগছ সৰবৰাহত স্কুলীয়া ছাত্ৰ