পুখুৰীত ব্যক্তিৰ মৃতদেহ উদ্ধাৰ

শিলচৰ, 17 জানুৱাৰী : কাছাৰ জিলাৰ কাজিডহৰত পুখুৰীৰ পৰা এজন ব্যক্তিৰ মৃতদেহ উদ্ধাৰ কৰা হৈছে । অতিৰিক্ত মদ্যপানৰ ফলত পুখুৰীত পৰি লোকজনৰ মৃত্যু হোৱাৰ সন্দেহ কৰিছে স্থানীয় ৰাইজে ৷ মৃত ব্যক্তিজনৰ নাম অম্লান কুসুম বুলি জানিব পৰা গৈছে । 

বুধবাৰে পুৱাৰ ভাগত স্থানীয় লোকে এটা পুখুৰীত ওপঙি থকা অৱস্থাত লোকজনৰ মৃতদেহটো প্ৰত্যক্ষ কৰাৰ লগে লগে অঞ্চলটোত হুলস্থুলীয়া পৰিৱেশৰ উদ্ভৱ হয় ৷  এই ঘটনাৰ খবৰ লাভ কৰিয়েই ঘটনাস্থলীত স্থানীয় আৰক্ষী উপস্থিত হৈ লোকজনৰ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে শিলচৰ মেডিকেল কলেজত প্ৰেৰণ কৰে । 

ইপিনে স্থানীয় ৰাইজে জানিবলৈ দিয়া মতে মৃত অম্লান কুসুম মদাহী লোক আছিল ৷ অতিৰিক্ত মদ্যপান কৰাৰ ফলতেই হয়তো তেওঁ পুখুৰীত পৰি মৃত্যুক আকোঁৱালি লৈছে বুলি সন্দেহ কৰিছে স্থানীয় লোক তথা আত্মীয়ই ৷

লগতে পঢ়ক: গাড়ী পাৰ্কিঙৰ কাজিয়া: গুলীত মৰিল এজন; গণ প্ৰহাৰত মৰিল তিনিজন