গোলাঘাটত তীব্ৰবেগী ডাম্পাৰে মহতিয়াই নিলে চাইকেল আৰোহীক

গোলাঘাট, 10 জানুৱাৰী : গোলাঘাটত দিনক দিনে বৃদ্ধি পাবলৈ ধৰিছে ডাম্পাৰ চালকৰ দৌৰাত্ম ৷ পুনৰ গোলাঘাট নগৰত ডাম্পাৰৰ খুন্দাত থিতাতে নিহত এজন চাইকেল আৰোহী ৷ মঙলবাৰে নিশা গোলাঘাটৰ বেঙেনাখোৱা চাৰিআলি সমীপত সংঘটিত হয় এই ভয়ংকৰ দুৰ্ঘটনাটো ৷

ঘটনা অনুসৰি, নিশাৰ ভাগত তীব্ৰ বেগত অহা AS02BC9477 নম্বৰৰ ডাম্পাৰখনে এজন চাইকেল আৰোহীক মহতিয়াই লৈ যায় ৷ যাৰ ফলত থিতাতে নিহত হয় চাইকেল আৰেহীজন ৷ নিহত লোকজন বেঙেনাখোৱাৰ অজয় কুমাৰ জয়ছোৱাল বুলি চিনাক্ত কৰা হৈছে ৷

ইতিমধ্য নিশাৰ ভাগতে ততাতৈয়াকৈ ঘটনাস্থলীত আৰক্ষী উপস্থিত হৈ দুৰ্ঘটনা সংঘটিত কৰা ডাম্পাৰখন জব্দ কৰে ৷ এই ক্ষেত্ৰত ৰাইজে কয়, ‘‘গোলাঘাটত চালকে ডাম্পাৰসমূহ ইমানে তীব্ৰবেগত চলাই সিহঁতে ক’ৰবাত জুই নুমুৱাবলৈ হে যাব যেনিবা ৷ সেয়ে ৰাতি 10 বজাৰ পৰা পুৱা 5 বজালৈকে ডাস্পাৰসমূহৰ চলাচল কৰিবলৈ দিব লাগে ৷ অন্যথা আৰু এনেধৰণৰ দুৰ্ঘটনা সংঘটিত হৈয়ে থাকিব’’ ৷

লগতে পঢ়ক : দেৰগাঁৱৰ জুবিন গাৰ্গৰ সংগীতানুষ্ঠানত একাংশ উদণ্ড দৰ্শকৰ উদ্ভণ্ডালি