কলিয়াবৰত শিশু অপহৰণকাৰীক আটক

কলিয়াবৰ, 01 জানুৱাৰী : সাৱধান ! ঘৰৰ সমুখত আপোনাৰ কণমানিটোৱে যদি খেলি থাকে, তেন্তে আপুনি নিচিন্ত হৈ নাথাকিব । কাৰণ যি কোনো মুহূৰ্ততে আপোনাৰ কণমানি সন্তানটোক কোনো অচিনাকী লোকে গোপনে লৈ যাব পাৰে । জখলাবন্ধা সৰুভগীয়াৰ ৩৭ নং ৰাষ্ট্ৰীয় পথৰ কাষতেই এনে এক ঘটনা সংঘটিত হৈছে ।

এজন অচিনাকি হিন্দীভাষী লোকে প্ৰায় দুবছৰীয়া এটি সন্তানক লৈ উধাও হ'বলৈ ধৰোতেই স্থানীয় লোকৰ সহযোগত হাতে-লোটে আটক কৰে কণমানিটোৰ মাতৃয়ে । জানিব পৰা মতে, কেইবাদিনো সৰুভগীয়াৰ যাত্ৰী জিৰণী ঘৰ এটাত এজন ব্যক্তিয়ে আশ্ৰয় লৈ আছিল । সেই ব্যক্তিজনেই সোমবাৰে দুপৰীয়াৰ ভাগত এই শিশুটিক কোলাত তুলি লৈ যাবলৈ চেষ্টা কৰিছিল ।

কণমানিটোক নেদেখি শিশুটিৰ মাতৃয়ে বিচাৰ খোচাৰ কৰে ৷ তেতিয়াই অচিনাকি লোকজনে শিশুটিক গৈ যোৱা প্ৰত্যক্ষ কৰি চিঞৰ-বাখৰ কৰে ৷ তেতিয়াই স্থানীয় লোকৰ সহযোগত উদ্ধাৰ কৰা হয় শিশুটিক ৷ ইয়াৰ পিচতেই স্থানীয় লোকে অভিযুক্ত লোকজনক বান্ধি ৰাখি জখলাবন্ধা আৰক্ষীক চমজাই দিয়ে । এই ঘটনাক কেন্দ্ৰ কৰি সমগ্ৰ অঞ্চলটোত সৃষ্টি হৈছে তীব্ৰ চাঞ্চল্যৰ ৷

লগতে পঢ়ক : সকলো নিষ্পত্তি হ’ল: গোচৰশূণ্য হ’ল মাজুলী জিলা