Body of missing student found in Gelabil river:গেলাবিল নদীত পৰি নিৰুদ্দেশ হোৱা ছাত্ৰৰ মৃতদেহ উদ্ধাৰ

যোৰহাট, 19 আগষ্ট : শুকুৰবাৰৰ পৰা গেলাবিল নদীত পৰি নিৰুদ্দেশ হৈ আছিল এজন ছাত্ৰ ৷ অৱশেষত ছাত্ৰজনক মৃত অৱস্থাত উদ্ধাৰ কৰা হয় গেলাবিল নদীত ৷ সন্ধানহীন ছাত্ৰজনক জীৱিত বা মৃত অৱস্থাত উদ্ধাৰ কৰাৰ ক্ষেত্ৰত প্ৰশাসনে হেমাহি কৰাৰ অভিযোগ তুলি এক অনাকাংক্ষিত পৰিৱেশৰ সূচনা কৰিছিল পৰিয়াল আৰু স্থানীয় লোকে । উক্ত পৰিৱেশ সৃষ্টি কৰাৰ পিচত শনিবাৰে পুৱাৰে পৰাই সন্ধানহীন ছাত্ৰজনক উদ্ধাৰ কৰাৰ বাবে দেৰগাঁৱৰ গেলাবিল নদীত অভিযান চলাইছিল SDRF বাহিনীয়ে ।

তাৎপৰ্যপূৰ্ণ যে শুকুৰবাৰে বিয়লি মাছ মাৰিবলৈ গৈ গেলাবিল নৈত সন্ধানহীন হৈছিল দেৰগাঁৱৰ বিলতীয়া শান্তিপুৰৰ নৱম শ্ৰেণীৰ ছাত্ৰ আব্দুল চুবহান আলি । অভিযোগ উঠা মতে ছাত্ৰজন গেলাবিল নদীত পৰি নিৰুদ্দেশ হোৱা খবৰ পৰিয়ালৰ লোকে প্ৰশাসনক জনোৱাৰ পিচতো ঘটনাস্থলীত উদ্ধাৰকাৰীৰ দল উপস্থিত নোহোৱাত তেওঁলোক প্ৰতিবাদ সাব্যস্ত কৰি এক অপ্ৰীতিকৰ পৰিস্থিতিৰ সৃষ্টি কৰিছিল ৷ ফলত পুৱাৰ পৰাই ছাত্ৰজনক বিচাৰি উদ্ধাৰ অভিযানত যুদ্ধংদেহি তৎপৰতাৰে নামি পৰে SDRF বাহিনী । অৱশেষত SDRF বাহিনীয়ে মৃত অৱস্থাত উদ্ধাৰ কৰিবলৈ সক্ষম হয় ছাত্ৰজনৰ মৃতদেহ । ছাত্ৰজনৰ অকাল মৃত্যুত অঞ্চলজুৰি এক শোকাকুল পৰিৱেশৰ সৃষ্টি হয় । উদ্ধাৰকাৰী বাহিনীয়ে গেলাবিল নদীত উপঙি থকা ছাত্ৰজনৰ মৃতদেহ উদ্ধাৰ কৰি আৰক্ষীক চমজাই দিয়ে আৰু আৰক্ষীয়ে মৰণোত্তৰ পৰীক্ষাৰ বাবে পঠাইছে মৃতদেহ ৷

লগতে পঢ়ক : Extra Marital Affair: পত্নীৰ অবৈধপ্ৰেমেই প্ৰাণ ল’লে নেকি বাবুল চেতিয়াৰ ?