Bihpuria MLA busy with agricultural work : ভূঁই ৰোৱাত ব্যস্ত বিহপুৰীয়াৰ বিধায়ক ড° অমিয় কুমাৰ ভূঞা

এতিয়া ভূঁই ৰোৱাৰ সময় । প্ৰতিকূল বতৰৰ লগতে বানপানীৰ বাবে কিছু পলম হ'লেও বৰ্তমান কৃষকসকল পথাৰত ব্যস্ত হৈ পৰিছে । প্ৰতিকূলতাৰ বাবে আনকি বহু কৃষক এইবাৰ হতাশ হোৱাও দেখা গৈছে । কিন্তু ইয়াৰ মাজতে কৃষকসকলক কিছু উৎসাহ দিয়াৰ উদ্দেশ্যে পথাৰত নামিল বিহপুৰীয়া সমষ্টিৰ বিধায়ক ড৹ অমিয় কুমাৰ ভূঞা (Bihpuria MLA busy in paddy field)। বিধায়কগৰাকীৰ সহযোগত বীৰ লাচিত বহুমুখী সমবায় সমিতিৰ উদ্যোগত সমষ্টিটোৰ বিভিন্ন প্ৰান্তত বিগত কেইবাদিনো ধৰি ভূঁই ৰোৱা কাৰ্যসূচী ৰূপায়ণ হৈ আছে । এই ভূঁই ৰোৱা কাৰ্যসূচীৰ সামৰণি অনুষ্ঠানত বিহপুৰীয়াৰ লাগাচু পথাৰৰ ২০ বিঘা কৃষি ভূমিত ভূঁই ৰোৱা হৈছে ৷ কেইবা শতাধিক পুৰুষ-মহিলাই একেলগে ভূঁই ৰোৱা কাৰ্যসূচীত অংশগ্ৰহণ কৰে । ইফালে কৃষকসকলৰ সৈতে বিধায়কগৰাকীয়ে পথাৰৰ কামত নিয়োজিত হোৱা দেখা গ'ল । আনহাতে এই সমূহীয়া ভূঁই ৰোৱা কাৰ্যসূচীত কৃষক, ৰোৱনীসকলোৱে গীত গাই আনন্দ উল্লাস কৰা দেখা গ'ল ৷