Seeking help for treatment: চিকিৎসাৰ বাবে সহায় বিচাৰি ঘূৰিছে ৰাজপথত

যোৰহাট,৮ জুলাই: দেৰগাঁৱৰ সমীপৰ কুৰালগুৰিৰ ৰাজপথত এজন ব্যক্তিয়ে কান্দিছে । চিকিৎসাৰ বাবে সহায় বিচাৰি আৰ্তনাদ কৰিছে ব্যক্তিজনে । ব্যক্তিজনৰ ঘৰ দেৰগাঁৱৰ মলাই কুমাৰ গাঁৱত । বাবুল ডেকা নামৰ আৰ্থিকভাৱে পিছপৰা প্ৰায় ৪৭ বছৰীয়া ব্যক্তি জনে মাতৃ সহ পাঁচজনীয়া পৰিয়ালটো পোহপাল দিবলৈ লোকৰ ঘৰত দিন হাজিৰা কৰিছিল ।  

দুই সন্তান,পত্নীকে ধৰি পৰিয়ালটো কঠোৰ সংগ্ৰামৰ মাজেৰে হাজিৰা কৰি পোৱা ধনেৰে চলাই থকাৰ সময়তে প্ৰায় ছমাহ পূৰ্বে লোকৰ ঘৰত মূধচত উঠি কাম কৰি থাকোতে হঠাৎ ওপৰৰ পৰা পৰি পিঠিৰ ৰাজহাড় ভগাৰ লগতে হাত ভৰিতো গুৰুতৰ জখম হয় বাবুল ডেকাৰ । প্ৰায় পাঁচমাহ ধৰি চৰকাৰী চিকিৎসা গ্ৰহণ কৰিও তেওঁ সুস্থ হৈ নুঠিল ।  

চিকিৎসকে উন্নত চিকিৎসাৰ বাবে গুৱাহাটীলৈ নিয়াৰ পৰামৰ্শ দিছে । উঠিব বহিব নোৱাৰা, আনকি বিষৰ কোবত শুবও নোৱাৰা ব্যক্তিজন বৰ্তমান আৰ্থিক দুৰবস্থাৰ বাবে চৰম সংকটৰ সন্মুখীন হৈছে । একমাত্ৰ উপাৰ্জনকাৰীজনেই শয্যাশায়ী হৈ পৰাত সম্প্ৰতি পৰিয়ালটোলৈ ঘোৰ অমানিশা নামি আহিছে । সেইহে এখন হুইল চেয়াৰত উঠাই পুত্ৰই এতিয়া ৰাজপথত সহায় ভিক্ষাত নামি পৰিছে ।  

দুৰ্ভগীয়া পৰিয়ালটোৱে চৰকাৰ প্ৰশাসন তথা ৰাইজৰ পৰা চিকিৎসা সাহায্য বিচাৰি কাতৰ আহবান জনাইছে । কোনো হৃদয়বান লোকে সহায় আগবঢ়াব বিচাৰিলে বাবুলৰ দেৰগাঁও ষ্টেটবেংকত থকা একাউণ্ট নম্বৰ ৩৫৮৯১৫৬২৫৯০ ত সহায়ৰ হাত আগবঢ়াবলৈ আহ্বান জনাইছে । 

লগতে পঢ়ক: Surya Bora death anniversary observed: মৰিগাঁৱত ভাষা আন্দোলনৰ শ্বহীদ সূৰ্য বৰাৰ মৃত্যুবাৰ্ষিকী পালন