New Assamese Movie: অসমীয়া ছবি লংকাকাণ্ড চাবলৈ বাছ ভাড়া কৰি গৈছে চলচ্চিত্ৰ প্ৰেমী দৰ্শক

সদ্য মুক্তিপ্ৰাপ্ত অসমীয়া চিনেমা লংকাকাণ্ড সগৌৰৱেৰে চলিছে ছবিগৃহত ৷ অসমীয়া উদ্যোগটোৰ বাবে এইয়া নিশ্চয়কৈ ভাল খবৰ । অসমীয়া চিনেমাই দৰ্শকক পুনৰ ছবিগৃহলৈ টানি নিব পৰাটোৱে উৎসাহ যোগাইছে চলচ্চিত্ৰ নিৰ্মাতাসকলক ৷ লগতে এচাম দৰ্শকৰ এই উছাহে ছবি এখনৰ প্ৰচাৰতো ইন্ধন যোগাইছে ৷ জুবিন গাৰ্গৰ কাঞ্চনজংঘা আৰু যতীন বৰাৰ ৰত্নাকৰৰ বৃহৎ সফলতাৰ পিছত অসমীয়া কথাছবি লংকাকাণ্ড চিনেমাখন চাবলৈ দৰ্শক ৰাইজৰ ব্যাপক সঁহাৰি দেখিবলৈ পোৱা গৈছে । উল্লেখযোগ্য যে, ৰঙিয়াৰ ডিলাইট চিনেমা হলত অসমীয়া কথাছবি লংকাকাণ্ড চাবলৈ বাছ ভাড়া কৰি গ’ল দৰ্শক । তামুলপুৰৰ পৰা বাছ লৈ ছবি চাবলৈ গ’ল দৰ্শক । সদ্যপ্ৰয়াত নিপন গোস্বামীৰ অভিনয় চাই আৱেগিক হৈ পৰে অসমীয়া ৰাইজ ৷ প্ৰথম দিনাৰ পৰাই হাউচফুল শ্ব’ । ৰঙিয়াৰ লগতে নলবাৰী, বৰপেটা আৰু বাক্সা জিলাৰ বিভিন্ন ঠাইৰ পৰা অহা শ শ দৰ্শকে লংকাকাণ্ড চাই আনন্দিত হৈ পৰে । প্ৰথম দিনাখনৰ পৰাই ছবিখনে ব্যাপক সঁহাৰি লাভ কৰা দেখা গৈছে । অসমৰ চিনেমা উদ্যোগলৈ যেন সুদিন ঘূৰি আহিছে । লংকাকাণ্ড চিনেমাখনে তাকেই প্ৰতিপন্ন কৰিছে ।